Suruik se Yuang Pasa lai, indak jadi ka Jawa naik patabang doh, maha bona, kalau dibali karicih tu untuk 4 urang, bisa bali sawah di lakuak mah. Walau Piak Manih mangambok, tapi lai ndak marentak doh. kasudahan kaji naik oto se ka Jawa lai.
“Jadi baa Yuang, jo oto se ka Jawa lai?”
“Yo bitu jadie Bilang, sansai den dek patabang ko, maha bonagh, taboli lo sawah dek karicih tu.”
“Eee yala, bali nak ubi, makan nak lomang, nak naiak patabang tapi nan murah, abak wak punyo nye,” kata Tembang menyolo.
“Ada bateh-batehnyo Tembang, tu kan bisnis mah, dek awak ndak bisa protes, wak pindah se ka oto lai, naik NPM se ka Jawa,” kato Pasa.
“Takana dek den ndak jak sangkek dulu lai karicih patabang ko maha?”
“Malin, dulu beda jo kini. Dulu tu, patabang sangenek, kini bajibun banyak-e, kapatang tu ha, sangaik murah samo jo ongkos bus ka Jawa nye, kini ransel se mambayia,” kato Pasa.
Lapau simpang memang indak katinggalan info doh, apolai Pasa harus pai ka Jakarta karano nakannyo baralek sinan. Nakan nan padusi, dapek jodoh, urang awak juo, samo-samo menggaleh. diputuihan baralek di Jakarta se. Tantu Pasa harus pai. Dek ka Jakarta, bini pai, dunsanak pai. lah gadang ati nak rang tu ka naik patabang, kiroe ongkoi satinggi langik.
“Baakokmambayialogai kalauwakbaok ransel Pasa?”
“Ma den tau.”
“Ndak Pasa sigi gak snek, tanyolah.”
“Eee yayai, aden lah esmosi se Lin,” jawek Pasa.
“Takana dek wak baa kok Tuan Malin nyinyia bana?”
“Risau den, anak nan tuo ka pai ka Kalimantan, nyo tarimo karajo sinan, tiket dibali se dulu, tibo sinan lai diganti, itu nan rumik kini ha.”
“Janragu,Pasaado,Bilangado,salangselupitie,kanlaindigantidekperusahaannyo mah,” kato Tembang.
Usulan Tembang ko indak mangkui, sabab Pasa paralu piti lo, sadang Bilang piti lakek di galeh, alun baliak lai.
“Makoe nye den indak usahlah pai-lai lai, siko se wak, ndak ciek juo nan ka marusuah, sagalo ado,” kato Gindo.
“Gindo pado ngecek ancak anok,” kato Pasa.
“Manga lo den dilarang-larang, ko negara demokrasi mah,” jawek Gindo
“Sajak ikuik pelatihan demokrasi di kantua bupati ko, Gindo lah menguasai sagalo hal mah, kerek den, tapi janlah ka kami- kami sarok-sarok balai ko dicuboan kaji tu,” kato Pasa.
“Sia madok den simbek, ilemu baru, nomor satu lo tu, sia lai, bia den caca,” kato Gindo basumangaik.
“Yolah Gindo, kalau mantun, jadi manuruik Gindo baa kok maha karicih patabang tu?”
“Biko Pasa, maha murah, sasuai jo permintaan pasar dan biaya operasional. Den contohan yo, goreang pisang di lapau ko maha dibanding 2 taun lalu, itu dek tapuang maha, gulo maha, pisang maha, jadi produksi jadi maha, kan lah bantuak dosen den, makoe jan dipanciang-panciang juo,” kato Gindo.
“Nan tuen Gindo lah bara kali naik patabang?” Batanyo Tembang.
“Kalau itu iyo alun ado lai, ha ha ha…”
Bitulah, Pasa ka naik patabang lah tau urang sakampuang, wee batal dek karicih maha, lah tau lo urang. Nan Pasa galak-galak se, malu indak, sagan pun indak.** (malin kapalo koto)
