Siang cako dari pasa, Yuang Pasa pulang mamakai comato itam. Bantuak Silpester Stelon bintang pilem Rambo dari Amerika tu gaya nak rang ko.
“Tadi siang pakai reben Yuang mpak dek den, coga bana, elok untuk kurban,” kato Malin Malano.
” Awak ko paralu manggaya sakali-sakali No, jan muno se potongan tu. Segeh stek, bali baju nan bacakak, kabek pinggang nan gagah, kok indak, lah bantuak kabau dalam lunau se wak,” kato Yuang Pasa.
“Bara balie tu Yuang. Asli tu?”Malano batanyo liak.
” Nakan den di Tanah Abang comato tu galehe mah, sapuluah ribu ciek,”kato Mak Pakiah menyolang
“Indak ciek juo nan elok dek urang awak ko doh. Mambali kacomato urang, inyo heboh. Babaju baru, nyo bingik,” kecek Yuang Pasa.
” Indak ado nan bingik doh Yuang. Urang batanyo bara ciek balie, sudah tu lai asli?” Sambuik Ujang Rantau, majalis lapau simpang tu.
“Kok disubsidi comato ko dek pemerintah baa nye, bia wak bali ciek surang comato itam, biah bia gagah rakyaik banyak ko. Kan presiden awak comatoe gagah-gagah mah, gubernur bagai,” kecek Ujang Rantau.
“Agak bakualitas lah ota stek ba nye. Kalau subsidi tantu bebem, listrik, bareh, barubek, tuh baru ebat wak surang-surang,” kato Tan Tembang. Agak kareh suaro-e.
“Susah den dek Tan ko. Sagalo subsido hapus sajak Mikel Kamdesus lipek tangan di muko Pak Harto sangkek sari,” kecek Malano.
“Sia tu garan Kamdesus?” Ujang Rantau batanyo.
“Tu manga se jak sari kalian-kalian ko ja? Kamdesus tu urang i-em-ef mah. Sangkek krismon dulu, wee mambantu Indonesia mah. Sajak itu sansai awak. Bato, awak jan diloge se sek urang cadiak-cadiak tu,” kecek Malano. Nan lain manganggo se.
“Baa tanganggo mandanga den ngecek?” Malano batanyo dan galak sengeng.
“Darima Malano tau namo apak tu?” Yuang Pasa batanyo.
“Tadi den naco buku anak den salayang ha ha ha.” Malano galak gadang.
“Jadi baa kacomato itam tu?” Dicukia baliak dek Rantau.
“Tu tando sejahtera mah. Berkeadaan kato rang kini,” jawek Mak Pakiah.
“Jan iruak juo. Bisuak den balian ciek surang. Tanang. Kumpuan piti kini satui surang,” cek Yuang Pasa lo.
” Kami jan yang lapun-lapun lo lai Yuang. Nan lain ang loge indak baa doh, caliak-caliak stek lawan ngecek,” sabuik Pakiah
“Kalau nio gagah, kok ndak tak baa lo doh. Banyak karajo den nan lain lai?” Cek Buyuang.
“Manuruik kito bia Buyuang se nan bacomato itam. Inyo kapalo arak. Lah di barih makan paek mah,” rang lapau Tuan Baralah lah sato lo.
“Wakden yo kapalo arak tapi rang lapau mamak kapalo warih. Em ka we kecek toke-toke tanah,” jawek Yuang Pasa.
“Ko kamari pai se kecek mah Yuang. Bantuak labah disemba alang. Ndak bapamatang sawah lai mah,” Angku Malano datang mengipeh.
“Bisuak Malano ancak manggaleh sate se lai, lah santiang mengipeh,” kato Pasa. Sa isi lapau tagalak.
“Kopsteng,” cek Yuang Pasa.
Nan lain batirik-tirik minta kopi. Ado nan mintak teh sariang. Nan Malano minta kopi susu. Ujang Rantau mintak teh talua.
“Agak mantap-an kocok se stek Tuan, pakek an tehnyo,” kecek Ujang Rantau.
“Jan acok-acok nah Ntau, teh talua ko mandanyuik mah,” kecek Pakiah
“Aa musakuik Pakiah?” Tanyo Yuang Pasa.
“Talua maha. Apolai talua ayam kampuang. Makin maha kalau talua ayam baliak,” jawek Pakiah.
“Kacomato iyo kadibalian atau indak? Kok iyo titip piti jo Tuan Baralah,” tambah Yuang Pasa.
Malam lah kalam. Yuang Pasa krese pese sae. Rupoe wee mangaluan comato itam tuh.
Dipakai-e malam tu salayang. Yo gagah
“Ha ha ha yo gagah ang Yuang, tapi talambek ha ha ha,” kecek Malano.
Sudah tu abih dek galak se ari dek urang di lapau simpang tu. Ado-ado se nan jadi bahan curito. (Malin Kapalo Koto)
