Ota Lapau

“Hondeh Yuang, Ma Urus Te Ha Er Lo Liau Kini”

Banamo Guru Salek, karano lah lamo ma-aja di sikolah, tapi honorer taruih. Dek Yuang Pasa langsuang ba agiah gala, “Guru Salek.” Sabanta se nyo, sabana lakek gala tu.

Namo sabananya Mudin Sutan Chaniago, tuh lah kini diimbau urang Guru Salek. Inyo lai acok ka lapau tapi indak lamo-lamo doh. Maklum we-e mamareso pe-er anak sikolah. Pagi lah pai, baliak ka rumah sanjo rayo. Panek we-e. Kadang-kadang ma agiah les ketek-ketek lo di rumah, lai dapek sangu saketek, pambali badak induak bareh.

“Salek, kamarilah ado sabuah den katokan,” kecek Yuang Pasa, nan lah duduk di lapau simpang. Yuang Pasa main catua kabau. Sadang basososh nyo main jo Wan Tengka. Tasasak kabau Wan Tengka dibuak-ek. Nan Yuang Pasa sabana lihai main catua kabau ko. Indak ado lawan, bitulah kiro-kiro.

“Apo garan, mangko denai tuan imbau,” kato Salek.

“Jawek angku mode kato-kato dalam randai banah mah Salek,” kato Yuang.

“Den kamaniru tuen nye. Batitahlah tuen, bia sajuak pangana, nak sanang kiro-kiro,” cek guru ko lo.

“Bitu mah Lek, lai tarimo te ha er lo ang ndak?”

“Kan dek tu lah, guru pe-en-es lai dapek, nan kami-kami honorer ko yo indak, manjijia se air ludah kami mencaliak kawan manarimo nyer,” jawab guru wak ko.

“Tu baa pangana guru kini tu, lai indak ta ibo ati, sabab pamarintah den caliak-kabi-kabian, barek sabalah.”

“Ondeh Tuen Yuang Pasa nan gadang basa batuah, kok itu nan tuen sabuik jatuah ka dalam aie mato. Lah mode gajah pa angkuik lado kami-kami honorer ko, baban barek, lurah jo bukik nan didaki, ujuang-ujuangnyo, nan te ha er urang lain juo nan dapek,” kecek Guru Salek.

“Eeee kapunduang masak, itu sababnya paralu eska pegawai tu nye den mah,” kato Yuang Pasa.

“Yuang Pasa jan asa mengecek sae, ko kabau lah den sosoh ciek, matilah,” kato Wan Tengka sambia galak.

“Pak guru yang budiman, saba se pabanyak, urang banyak manganggur, awak lai ma aja ka sikolah, dapek rumpuk rage tiok bulan, nan kawan, kadang dapek kadang indak. Kok lai maha lado lai manih galak mode Yuang Pasa ko, kok indak? Jan disabuik, utang-utang-i,” kecek Wan Tengka.

“Nasihat Tengka sabana dalam ye, tapi den indak satuju tu doh. Saba jo mahagham je, jo indak ba usaho beda mah Tengka,” kecek Yuang Pasa.

“Colah curai papahkan ka den, bia siang bak ari,” kato Tengka.

“Ang simak elok-elok, pasang talingo kuali ang tu lah. Awak paralu ba usaho, jan saba ka saba se. Tuhan manyuruah awak kreatip. Aktip, pagi jago, baserak di muko bumi Allah ko mancari rasaki, bausaho, itu pasan ugamo, lai jalei tuh?” Kato Yuang Pasa mode ustad lo nyo sakali ko.

“Kalau itu lah jalai dek den mah, sajak di surau sari lai. Kini kan nan wak kecek-an Guru Salek nan malang ko ha. Urang dapek te ha er, inyo indak. Yo saba se pabanyak nye. Kalau ba usaho jadi pe-en-es, itu paralu tu. Tintiang tarui Guru, sampai dapek pe en es tu, bia bajaso disikolahan, ye ndak,” kato Tengka.

Sabanahe bitu mah, kato Guru Salek. Ambo jo kawan-kawan alah bausaho baa nak dapek te ha er, tap itu mah undang-undang indak mambulian.

“Den kiro paralu Pak Jokowi turun tangan mah,” kato Yuang Pasa.

“Santiang kudian se Yuang Pasa ko ndak Guru,” kato Tengka.

“Jan salah-salah, den lah jak sari santiang mah, cuma nasib tak saelok apak-apak pejabat tu,” kato Yuang Pasa.

Manuruik Yuang Pasa, urang-urang mode Guru Salek ko paralu lo dapek te ha er mah, sebab kan samo-samo gurunye. Nan jadi pikiran deknyo, baa kok ado-ado se pitih pemerintah.

“Kecek e utang banyak, nagari sadang mambangun, hematlah, inyak-etan sagalo macam, tapi untuak te ha er ado juo. Tak ti den ko pitih pajak lo ko mah,” kato Yuang Pasa.

“Oi Yuang jan sumbarang takok sen, lah den kecek an ka angku, mangecek siang caliak-caliak, mengecek malam agak-agak, kini banyak intel, den ma anta-an nasi ka tahanan ndak talok doh Yuang, antah ko ka manjago rang rumah Buyuang, bialah den basugiro,” kecek Wan Tengka pulo.

“Stek-stek intel, lai jalai dek Tengka, ko Indonesia ko mah, demokrasi nagari ko, buliah wak mangaritik nye, nan indak buliah tu menyerak-an raso banci, tarang den dek tu mah,” kato Yuang Pasa.

“Santiang! Patuik Pasa jadi anggota dewan mah, bisuak ko majulah, bia den piliah,” kato Tengka.

“Suai, maju, tolong pajuangkan nasib kami guru-guru honor ko tek, bia den piliah lo,” kato Guru Salek.

“Opss, guru indak buliah bapolitik, kanai pasal-pasal,” kecek Yuang Pasa.

Nan Guru Salek galak manih. Wan Tengka tasenggeang sen.

“Bagilah labo lado tu, te ha er namoe,” kecek Wan Tengka.

“Mamintak kancang, ma agiah tak amuah,” kato Yuang.

Samantang pun baitu, nan Wan Tengka dapek traktir sasanjo itu, duo bungkui pabukoan, perai. Guru dapek lo kolak labu.

Tuan Baralah, rang lapau nan duduak dakek laci piti, galak manih sen. Galehe laku, baa ka indak (Malin Kapalo Koto)

Berani Komen Itu Baik
Tirto.ID
Loading...
To Top