Trending | News | Daerah | Covid-19

Ota Lapau

Gilo ka Lapau Sae, Zakat Lah Babayia?

Dibaca : 360

“Malano, duduak elok-elok, lipek tangan, ang Tembang, pasan teh talua mamak, den ka ma aja sa isi lapau ko jo kaji adat, bia ado padoman iduik kalian surang-surang,” kecek Pasa.

“Ha ha ha, Pasa nye deyen, kalau ka mintak teh talua perai jalai-jalai,” kato Malano.

Alun lai Pasa ka mangecek, tibo Tuak Pucuak di lapau tu. Aniang pukek sakali

“Ee Datuak,” Tembang lo dulu manyapo.

“Baa abak ang, lai sihaik ndak tampak duo ari ko,” Tuak Pucuak batanyo.

“Salemo Tuak, damam abak wak,” kato Tembang.

“Pulanglah, uruik pungguang gaek tu indak di lapau ka di lapau juo doh, sanangan atie,”kato Tuak Pucuak.

Mode kuciang dibaok-an lidi. Cigin Tembang sakali. Lighui je jalan-e nye.

Nan lain galak bagumam. Ka galak gadang antah, indak ka galak, nyo sabana tapek tembak Angku ko.

“Baa Pasa, lai elok sen ladang lado?”

“Lai Ngku, cuma racun sabana maha.”

“Wak dek ndak pandai mambuek makoe maha,” jawek Datuak

“Malano baa.”

“Insya Allah lai barasaki stek.”

“Zakat mal lah bayia. Zakat fitrah??”

“Fitrah alah Tuak, nan mal rencana bisuak sudah sunbayang rayo dianta ka rumah garin,” jawek Malano.

“Kok mati Malano 5 minik lai, sia ka mambayia tu. Gilo ka lapau se, zakat ndak babayia.”

“Basigiroh lah. Yuang hai ang anak sia?” Tuak Pucuak mangubik anak ngenek di pintu lapau.

“Anak Wan Sudi di ujuang tabiang,” jawek paja ngenek tu.

“Ang jan main ka lapau. Alun pandai mancari. Kini ang pai ka musajik, kecek an ka garin, diimbau Tuak Pucuak,” kato datuak.

Anak tu aniang se tapi wee balari sakali arah ka musajik. Sakancang kijang jantan.
Indak lamo antaroe tibolah garin di lapau.

“Maimbau Tuak?”

“Malano ko garin lah tibo bayialah zakat. Ang Pasa, bayia sakali zakat mal. Kok alun fitrah, kini bayia. Jo rang rumah bayian, abak, amak, mintu, adiak-adiak. Kalian zakat bajanji-janjian, tu rasaki urang mah. Tuhan baragiah langsuang se, lah bi dapek beko ka bisuak. Bayia kini!”

Manarimolah garin zakat mal dari duo urang di lapau tu. Indak nyo sangko-sangko doh. Sabana boneh.

“Lah tu den pai lai, ee yo Bilang. Baa lah bayia zakat?”

“Alah Tuak”

“Dima bayia?

“Di musajik dakek pasa Tuak.”

“Sabanahe tu?”

“Yo alah Mak.”

“Syukurlah. Baralah bara zakat taun ko?

“Alah ba etong dan alah basarahan ka musajik untuak anak yatim mah Tuak.”

” Alhamdulillah, yo wak den pai lai, ugamo wak, awak manjago. Adaik wak, awak manjago. Rasaki wak dijago lo.”

“Yo Tuak,” ampia sarantak apak-apak tu manjawek. (Malin akapalo Koto)


Baca Juga :

Berani Komen Itu Baik
To Top