Trending | News | Daerah | Covid-19

Ota Lapau

Gaek Balevis, Bak Cando Kudo Tuo, Untuang di Kadang Diratok-i

Dibaca : 1.3K

Samakin rami se kampuang ko. Lapau simpang apolai. Anak sikolah lah bi pulang. Nan bujang- bujang, sabana jenggo. Nan gadih-gadih tak tantu nan kadisabuik. Lah bantuak sarang samuik tacangkuah, sabana rami.

Nan gadih-gadih tu bi bagiriang-giriang kaki-e. Sakali langkah, dariang badariang. Sakali ayun babunyi-bunyi.

“Pasa, ilang aka mancaliak nan mudo-mudo? Ciinan ang?”

” Sanang ati den, apolai nak gadih nan ba giriang-giriang tu ha,” cek Pasa.

“Ha ha ha Pasa, tuo alun, mudo talampau, gilo maangguak-angguak sajo co balam mau,” kecek Kuriak Batuang.

“Lah mode kudo bendi, tuo, sangkek mudo awak tapakai, kini nan mudo nan ka pasa, awak marintang ari jo rumpuik kariang, di kandang untuang diratok-i, bitu banalah nasib Yuang Pasa kini,” kato Wan Tengka.

“Basalahan bana kaji Tengka mah, bakecek an Yuang Pasa kudo tuo?” Kato Malano.

“Malano bagai, satali tigo uang, samo se tu nye?” Kecek Wan Tengka.

“Nan tuo maratok-i untuang di kandang, nan mudo-mudo mode kami ko yo bakacak duya lai, menyingkirlah, kami akan lewat. Plisss,” kato Tan Tembang.

“Tembang ko lah kacak langan bak langan mah, lah bantuak anak buterprah mpak dek den,” kato Tuak Bilang.

“Ha ha ha anak kadapol,” tambah Pasa.

“Tembang ko bantuak si bujang baru bakarih, bantuak inyo se nan santiang,” semba Kuriak Batuang.

“Kudo tuo diam, ari lah sanjo, maringkiak se lah lai. Kok ado jatah sagu, tarimo kok indak, idok-anlah nasib tu,” jawek Tembang.

“Sia nan Tembang tembak ko? Pasa?” Malano mamanciang lo liak.

“Salingkuang sasak di lapau ko, kecuali ambo jo nan mudo-mudo ko ha,” kecek Tembang.

“Ko Tembang ko lah maraso gadang mah Pasa, lalu badan, lalu kapalo, nyo lendo se wak,” kato Wan Tengka.

“Lambut! Bae Tembang. Cocok den, apak-apak ko a juo lai, lah lindok ari, nyo sangko masih pagi. Gigi lah tangga, lutuik lah guyah, eee gaek basarawa levis, sadar lah ko lai,” kecek Yuang Pasa.

“Eee Buyuang, caliak badan lah co papan, sok mudo juo lai, ka surau lah lai baa nye?” Pakiah nan sajak tadi anok je kini bakicau.

“Woi Pakiah, sadarlah. Gala lai pakiah, nan kulik lah kenyuik, luko lah banyak, langkah lah sayuik, namun lenggok co itu juo, saroman bana jo badak jantan,” kato Tuak Bilang.

“Bato ka den batembak-an mah Bilang. Bilang lah mode bola beten anak-anak, lah ilang ragi, den sumbek pangka talingo tu jo goni gulo baru tau,” kato Pakiah.

“Jadi baa gaek balevis jo kudo tuo ko?” Nak mudo Tan Tembang ba ulah lo liak.

“Ha ha ha lah basuok -an makan, pinggang lah sakik, batuak lah co tabiang runtuah, “ kato Pasa.

“Lah payah tagak, ha ha,” kecek Tembang.

Samalam ko bi Ka-O apak- apak dek Tembang.

“Sanang bana ati den Tembang, apak-apak ko paralu diagiah palajaran mah, ndak jalai dek nyo urang ka rayo,” kecek Pasa nan dapek angin sajak tadi. (Malin Kapalo Koto)


Baca Juga :

Berani Komen Itu Baik
To Top