Ota Lapau

Etek Ratna

 

“Barang siapa yang berbohong maka…,” kato Tembang.

“Baso awak se lah, angek talingo den Tembang,” kecek Pasa.

“Jan berang-berang se tuen, bae kopi steng lu. Rang lapau kopsteng, paik, kacang padi sapiriang, randam-an pisang rajo tu sakali ka nin,” kato Tembang. Di lapau simpang ko, pagi-pagi yo kacang padi angek tu nan sero.

 

“Jadi baa, taruihanlah Tembang,” kato Gindo.
“Wak ka ngecek an tek Ratna Sarumpaet tadi mah,” katoe.

“Namo urang jan salah-salah, “ kecek Pasa.
“Tanang tuen, ko etek Ratna kan baduto, kini lah maleba-leba se, pansan den maliek” kato Tembang.

“Tu nan hoax,” kato Malin.
“Makoe den kecek an, bapulitik ko pado2i, jan kajang bana, kalua lo urek lihia, ndak kojo tu doh,” sabuik Pasa

“Coba bayangkan, bangsa wak ko, panganae sabana indak ado. Tsunami di Palu bisa ilang dek berita Ratna, pulitik se, baa ndak ka susah iduik, cegaklah lai woi,” kato Bilang.

” Yo ndak, sabana tasambua sumangauik bangsa wak ko kalau soal pulitik, heran den,” kato Tuan Baralah sambia mambuek an kopi untuk majilih lapau simpang.

” Kalau ngecek pulitik bisa sakandak ati wak se, lai bisa manganggo, satolah,” semba Kuriak Batuang nan jak tado aniang sae.

“Jadi Tek Ratna baa?” Kato Pasa.

“Wee baduto, awak aktivis, dikelokkan urang ka pulitik, kini ditahan polisi, sailah.”

“Banyak kecek, banyak salah, banyak salah, banyak doso, kan bitu Pasa?”

“Bana Rasullullah. Etek tu tataruang di nan data mah,” jawek Pasa.

“Sabanahe tuen, apak-apak acok lo baduto mah, ditenju kawan bakecek an ka anak kanai pintu, yo kan?” Tembang mamanciang.

“Jadi Etek tu bitu?” Tanyo Pasa.
“Asa samulo sipatuang ka anyuik yo bitu.”
“Karapai”
“Makoe ijan baduto juo,” sabuik Gindo.
“Pulitik ko duto mah Gindo,” semba Pasa.
“Kok itu baa juo lai.”

Soal Etek Ratna, jadi bahan ota di kapai pagi tu. Sabana bakucatak, co itiak ka dadak, co ayam ka jamuran. Sabana rami.
(Malin Kapalo Koto)

Baca Juga :

Berani Komen Itu Baik
To Top