Trending | News | Daerah | Covid-19

Ota Lapau

Baroyak Taruih Nagari Ko

Dibaca : 378

Gampo sabana acok, Pasa lah gilo mengucap sae. Kecek Pakiah, indak kutiko gampo se mangucap doh. Sadang ari elok, Tuhan wajib dikana taruih.

“Itu nan maleh den mancaliak Pasa, wakatu tasasak takana Tuhan, kutiko indak, sumbayang lalai,” kecek Pakiah.
Majilih lapau simpang pagi tu langsuang se sapakaik jo Pakiah.

“Suai den Kiah sabab Pasa memang agak mada,” kato Kuriak Batuang.

“Yo tu nyo, lah batuneh muncuang dek mengecekan,” kato Guru Salek.

“Jan wakden lo nan jadi bal pagi ko, masak kanai sipak se. Wakden ko potongan nan buruaknyo, nan sumbayang lai indak ado tingga doh,” jawek Pasa.

“Kalau mantun syukurlah, nan kaditarimo juolah amal Pasa dek Allah,” Malano manjawek.

“Makin gadang pahalo tuen Pasa kalau minum pagi ko tuen bayia sadoalahe,” kecak Tembang pulo.

“Soal bayia mambayia tu kaji manurun mah, kapatang den danga Bilang balabo gadang galehnyo lah patuik nyo bagi ka awak-awak ko mah,”kecek Pasa mailak.

“Jan ka aden lo hampehnyo, sapakan ko Pasa ba siul-siul sae, lado bawang jo tomaik balabo. Alun lai talua,” kato Bilang.

“Jan bacakak, baduo se mambayia. Dek den teh talua, roti sarkana, paniaram ciek, rokok satangah,” kato Malano.

“Barek mah Malano, lapeh salero,” kato Kuriak Batuang.
Samantaro itu, Tuan Baralah lah mulai ma etong balanjo apak-apak nan minum pagi tu. Tantu nyo galak-galak surang se sadang ma etong tu.

“Ko soal gampo baa kok soal mambayia se jadie? Den risau dek gampo malah den nan kanai porot,” kato Pasa.

“Wakatu nagari sadang acok baroyak ko, pa banyak basidakah Pasa, bia banyak pahalo,” kecek Malano.

“Ancaklah anak yatim den tolong lai,” kato Pasa.

Gampo memang acok kini tapi syukurlah lai ketek-ketek.
Yolah bitu pagi tu, Pasa jo Bilang mambayia minum nak rang tu. Salapau-e nyo bayia baduo. *


Baca Juga :

Berani Komen Itu Baik
To Top