Abih puaso ko sabana baneneang urang baralek. Dari rumah, ka jalan taruih ka gedung. Makan baselo, duduak di kurisi sampai tagak.
“Pansan den banyak bana baralek kini,” kecek Pasa.
“Manga Pasa pansan, kanai undang indak, dari kapatang duduak se di lapau nye,” kato Bilang.
“Ee ndak ye, ma agak-agak-i deyen.”
“Apo nan Pasa pikia, ka baralek lo Pasa liak?” Panciang Pakiah.
“Amuah tu, sato wak ma anta,” kato Tembang.
“Woi Tembang, anyuik lah ko, ang den suruah babini karajo mamadek-madek labuah se,” kato Pasa.
Pasa batua, yo sabana banyak urang baralek sajak rayo. Gubernur gai baralek lo, redaktur prokabar.com si Ari nan subur tu ha.
“Baralah uang babaju rancak banyak e tu ndak,” kato Bilang.
“Manga baju urang nan bilang kana?” Kato Pasa.
“Ciinan lo den babaju batik co apak-apak tu,” kecek Bilang.
“Balilah, piti lai tapi sampilik, ka babaok mati piti tu,” jawek Pasa.
“Maha”
“Nan murah singket cap swan nye,” kecek Tembang lo sambia menyamba rokok Pasa. Sudah tu nyo bae goreang pisang lai.
“Urang salapau ko dulu baa baralek, lai mode kini?” Tembang batanyo
“Woi jan disabuik lai Tembang, sabana rami alek Pasa, siang malam,” kato Malano nan jak tadi mandanga se.
“Alek gubernur baa?” Tuan Baralah batanyo.
“Ma tau den, tak kanai udang,” kecek Pasa.
“Basalahan bana tu, tuen Pasa ndak kanai udang kapalo arak lapau simpang ta icia,” kato Tembang.
“Ang jan den lo dihambok lai Tembang, den gergaji kuduak tu beko,” kato Pasa.
“Jan basisalak juo di lapau den ko, awak sia, kok ka kanai undang gai dek pak Gubernur,” kato Baralah.
“Yo itu nye deyen mah, awak sia, beko malam se pai mandanga saluang lai ka rumah nakan Pakiah,” kecek Malano.
Sapakaik majilih lapau beko mandanga saluang ka rumah nakan Pakiah. (malin kapalo koto)
