Trending | News | Daerah | Covid-19

Ota Lapau

Baluik Baranak Baroda Pakai Oli

Dibaca : 338

“Sabana galia, mambana den kalau ba urusan jo Buyuang Ragu tu,” kato Pasa.

“Ha ha lah kanai lo Pasa?” Galak Wan Tengka.

“Katoe utang dibayia jalang puaso, sudah tu minggu muko. Baraliah lo lai, 15 ari puaso. Ditanyo dek wak sapakan lai. Ditanyo lai, lakik rayo. Kini nyo lah ilang antah kama.”

“Pasa nan ele,” kato Tengka.

“Indak takao dek den do lai. Jaran. Sabana baluik baranak baroda pakai oli,” kecek Pasa.

“Pasa ndak batanyo atau ele?” Kato Malano.

“Den dek ibo, katoe bininyo sakik,” kecek Pasa.

“Bara nyo nyalang piti?”

“Mo atui,” cek Pasa.

“Lah sabalik urang kanai deknyo mah Pasa. Nyo pagiliran, Pasa bukan yang terakhir wahai pria kepala arak, kena engkau ha ha. Rasailah,” kecek Malano lo liak.

Duo bulan lalu, Yuang Ragu mambana ka Pasa. Wee inyo indak bapiti, samantaro binie sakik. Manitiak aie matoe manyalang piti. Dek mode tu mangko Pasa manyalangan.

“Den dek ibo se waktu tu nye,” cek Pasa.

“Anggap se basidakah, bayia zakat mal bagai, dapek pahalo tuen Pasa lai dari pado marutok-rutok sae,” kecek Tan Tembang.

“Kalau ka basidakah ancak ka urang siak lai atau anak yatim,” kecek Pasa.

“Sakali ko ka inyo selah. Jan dipikian juo,” saran Malano.

“Yo sabana kanai den,” kecek Pasa.

“Manuruil den Yuang Ragu indak galia gai doh, tapi memang keadaan nan mambueknyo mode tu,” kecek Pakia.

“Lah sabulan urang karajo jalan jo dana desa, balenong, sabana rami baa inyo ndak sato?” Tembang manyolang.

“Yo urang karajo inyo ndak muah, nio e manarimo barasia se. Jadi Pakia jan mambela Yuang Ragu tu juo lai,” kato Pasa.

” Indak sato nyo jo dana desa doh?” Pakia bantanyo.

“Jan ba ilau-ilau juo lai mak Pakiah. Kan tampak mah,” kato Tembang.

Tiok nagari memang ado urang nam galia mode Yuang Ragu tu. Kini nan jadi korban Pasa, kapalo arak tu bana, kabaa aka lai. (Malin Kapalo Koto)


Baca Juga :

Berani Komen Itu Baik
To Top