Sahari kapatang, balenong oto ngeong-ngoeng di Padang. Yuang Pasa, sadang di Padang, inyo pai mambali sice nan rancak, maklum, pitie sadang banyak. Labo jua lado lipek takulai. Lah lamo bini-e ci-inan bakuri rancak dari Padang. Makoe nyo kaja-an bana pai.
Tibo di Padang, badamok jo rombongan presiden, untuang lai ndak lamo jalan tasumbek, karano Pak Jokowi naik kureta api. Dasar Yuang Pasa, indak sice nan nyo urus doh, inyo pai ka Simpang Haru. Dicari bemo tak ado. Ma ado juo lai, lah bakirok oto roda tigo tu jak lamo. Tapaso inyo naik bendi ke nin.
Di Simpang Haru, tampaklah deknyo sitasiun gadang. Nan Yuang Pasa, bisa agak mandakek. Inyo tagak jo rombongan apa-apak. Taragak mancaliak dakek Pak Jokowi.
Pak Jokowi ka Padang maresmian kureta api ntun. Sudah tu pai ka rumah sikolah banamo Hamka. Namoe se, nan punya kaba-e indak anak Buya Hamka bagai doh. Sudah tu Pak Jokowi sobok jo ulama, dah tu nyo ma agiahan sertifikat musajik. Banyak.
Samalam-malam ari Yuang pasa pulang. Nan binie, Upiak Manih, menggarutok-garuok sen.
“Tapi pai bali sice, nan uda bakaja ka Simpang Haru, mancaliak presiden, awak batingga-an se di Pasa,” kato Upiak.
“Ondeh Piak, presiden deyen tu mah, bilo lo lai kadicaliak dari dakek,” kecek-e.
“Iyo awak taragak lo, tapi batingga-an sajo upiak di pasa, ibo ti upiak,” cek binie.
“Tapi bali sice, dek kau nan jalai ma nan rancak tu nye,” kecek Yuang Pasa.
Untuang tadi, sabalum ka Simpang Haru, nak rang baduo ko lai sempat bali cokolaik, kain panjang, kue kariang, baju rancak, sarawa gagah untuak rayo, baju langan panjang, kabek pinggang, ka palagak dek Yuang Pasa rirayo. Upiak sempat lo mambali cincin dua ameh di toko ameh Murni di pasa. Baju, selendang, kacomato bagai.
Sudah tu Yuang pasa pai lai. Tingga Upiak Manih membali sagaban makanan. nan sice yo sabana sero. Lamo Upiak mamiliah, dapek nan di ati. Dibali sice tu, langkok camin badak bagai.
Di jalan di ateh oto bacater tu, Yuang Pasa bagumabek bacaroto soal Jokowi.
“Piak tadi liau melambai bagai, den lambai lo, tapi bakalainan se. Liau ka sinan den kamari, indak basobok lambai ko doh,ha ha ha,”kato Yuang Pasa.
“Nyk manga kamari, agak acok mpak dek Upiak.”
Patang-patang tu tapi ka Pariangan, ka Sungai Tarab, ka Solok Selatan, ma urus rumah gadang di sinan. Sudah tu membuek jalan tol.
“Jalan tol ko samo jo jalan er-ce-a nan di Sijunjuang tarui ka Sitiung tu Da?”
“Segeh dari itu lai, balari oto 100 kilometer sajam, latak an galeh barisi aie panuah teh oto tu, indak tatunggang doh Piak, bitu banalah lah ka licinnyo,” kato Yuang Pasa pulo.
“Lah sudah jalan tu Da,sinan wak lalu lah,” Upiak indak saba.
“Alun lai, ka mulai baru.”
“E yayai ye, alun lai, kok ota uda bantuak lah sudah jalan tu?”
“Kecek-kecek urang den danga.”
Indak panek-panek e laki bini ko ma ota, sambia mengulek-ngulek cokolaik.
“Oh yo da, tampak gubernur wak tadi?”
“Lai, liau pakai batik,” jawab Yuang Pasa.
“Lai uda sapo liau?”
“Lai”
“Apo cek liau jawek-e?”
“Nyo dari jauh se den saponye,” jawek lakie.
“Eee karambia, upiak aban-an oto puso ka kapalo uda tu beko, tu indak sapo namoe tu doh,” kecek si Upiak. Tabik bocan-en dijujuik-e talingo Yuang Pasa.
“Sakik mah Piak, den gisa-an kalpanak ka iduang kau tu beko,” kecek Yuang Pasa.
“Uda tea, ma lo Pak Jokowi tau jo uda, ma gubernur kenal, manga da tasasak bana ka Simpang Haru tu, mahambian ari sen,” kecek Upiak Manih.
“Dek kau tak ciek juo nan jalai doh. Dulu sangkek Pak Harto awak ngenek-ngenek, malambai-lambai se. Waktu Pak SBY ke Bukiktenggi wak ndak sempat pai, lado dek ulek wakatu tu,” cek Yuang Pasa.
“Iyo ndak da. Kini elok paruntuangan ladang wak da. Tu mah ka Padang wak bali sice,sobok jo Pak Jokowi,” kecek Upiak.
“Santiang kau taraso dek den,” kecek Yuang pulo.
Yuang Pasa bacarito ka binie bahaso anak sikolah tadi balirik dakek jalan kuretapi. Malambai-lambai.
Di Simpang Haru anak sikolah ba selpi-selpi jo presiden. Sangkek sari ma bisa kanai lendo wak dek tentara gadang-gadang badan. Bisa dek kuro dibueknyo.
Tampak dek Yuang Pasa anak sikolah manih-manih bapoto-poto jo presiden. Jo macam gaya. Mode jo kawan nyo se.
“Yo bana piak, baselpi bagai. Biati den.Upiak taragak lo baselpi tapi jo induak bareh presiden”
“Kok kamari sakali lai, piak ka selpi lo da, jo etek tu.”
“Tibo di den kau galak an, kini malah kau nio bapoto bagai ha ha.”
Sangkek dulu hape tak ado, mandakek tak bisa. Kini jan disabuik, nyo karumuni presiden dek anak-anak tu pacil hape ciek-ciek. Yo sero ndak?
“Suak pai wak da bilo kamari liau. Wak bapoto. Wak les. Gadang-gadang
Latak an d barando rumah wak. Dah tu wak latakan lapau simpang ciek yo,” bini Yuang Pasa sanang bana atie
Oto tarui bajalan, malam lah galok. We-e babuko di jalan. Agak sajam lai baru tibo di kampuang. Nan Pak Jokowi lah jak tadi tibo di Jakarta. (Malin kapalo Koto)
