” Ha ha Guru baa ndak pai demo ke kantua gubernur di Padang, ndak setia kawan guru mah,” kato Yuang Pasa ka Guru Salek nan inggok di lapau simpang pagi. Wee nak pai maja doh, sabab kangkawan- e pai demo.
“Ambo ndak pai tapi kami kompak, kami ado utusan,” cek Guru.
“Jadi apo masalahe Guru?”
“Ee yayai batanyo juo lai. Lah bara taun den jadi guru honor tampak dek Pasa?”
“Yo lah lamo, alun ba aspal jalan ka lurah lai, lah jadi guru honor juo mpak dek kami,” kecek Pasa.
“Makoe kami-kami ko jadi gajah pa angkuik lado se, nan diangkek urang lain juo, lah bataun-taun jadi guru honor, malakik tukang tibo, indak kami nan ba angkek jadi tukang doh, pemeringah ko kabi-kabian,” cek Guru basumangaik.
“Nan Guru jalai dek kami, kan ado lo kawan-kawan guru nan ndak patuik jadi guru honor, bamasuakan juo, tu baa lo tu?” Batanyo Malin.
” Ha ha yo salek an lah ciek, honor se jadi mah, pernah wak mandanga mah,” kato Tembang.
“Tapi 90 persen kami ko profesional mah, ado akta maja, lah abih umua di rumah sikolah, nan salek-salekan lah ciek tu, kini lah ndak ado lai,” kato Guru Salek.
“Jadi bilo Guru ka jadi pns?” Batanyo Tembang
“Sampalah karambia, itu nan kami demo, dek alun jalai juo nasib ko, Tembang batanyo juo lai.”
“Banting stir selah Guru baanye?” Kato Gindo Talam, anggota lapau simpang nan lah sataun tak datang- datang, kini lah masuak ka lapau liak.
“Gindo ngecek se, lah talojok jauh ka muko, banting stir apo juo lai. Iko padok cieknya Gindo, mako kami manyasak untuak diangkek,” kato Guru Salek.
“Demo alah, gubernur sadang bajuang, nan Guru ancak badoa se lai, bia ditolong Tuhan,” kecek Pakiah manambah.
“Jadi Kiah, samo badoalah awak yo” kato Guru.
“Aamiin aamiin,” kato Yuang Pasa. (Malin Kapalo Koto)
Baca Juga :
Berani Komen Itu Baik
