Yuang Pasa talaik jago. Nan lain bitu pulo. Apolai ari ujan-ujan, tumah, balai ambek langgang dibuek-e.
“Baa dek bi mancebek pemain bola tadi malam tu Yuang?” Kuriak Batuang nan bagalumun kain sarung batanyo.
“Manga ka den. Inyo nan bi manangih, ka inyo tanyo,”jawek Yuang Pasa sumbarang kanai sen.
” Ap main bola. Bilo? Lai den caliak di tipi. Salayang sen, RM lawan apo tuha live. Aa tu RM?” Pakiah batanyo.
“Oiii urang sanagari. Ado dunsanak awak nan pakak bajadi ko ha. Piala dunia swasta we-e indak tahu. Astaufirullah,” kecek Yuang Pasa.
Urang bi tagalak. Pakiah galak lo.
“Den indak hobi bola. Itu nan sabanahe.” Pakiah membela diri.
“Pakiah nan gagah. Nan terhormat. Danga elok-elok yo. RM tu kapanjangannyo rumah makan padang. Liv tu live musik,” lah biang?
“Ha ha ha..” Pakiah galak
“RM tu Real Madrid, liv tu liperpul, tu kaji bana ba agiahan ka Pakiah mah,” kecek Ujang Rantau.
“Jadi bara main. Sia manang?” Pakiah batanyo lo lik.
“Ado masin giliang ndak? Atau fuso rusak. Bia den aban kapalo Pakiah ko,” kato Pasa. Tabik aie mato Pasa dek galak. Nan lain kareh paruik-e.
“Dek den nan jalai pe es pe jo simin adang sae nye.”Pakiah baulah lo liak.
“Mambang jimbalang tanah, antu aru-aru, baa lah koh nan surang ko. Ubek lah lai,” kecek Pasa lo.
Bitu bana lah. Lapau bakucatak ma analisa main bola parak siang cako. Si Salah baa kok kalua. Dek apo bahu nak rang tu. Ronaldo ko kaki dari apo. Ruyuang?
Sampai curito baa bola kaki awak indak maju-maju.
Sadang lamak mangecek. Ujan turun. Labek bajadi. Indak lai. Bubar majelis ota lapau simpang samalam tu. (Malin Kapalo Koto)
Baca Juga :
Berani Komen Itu Baik
