Lapau simpang sabana sasak. Kapalo arak, Yuang Pasa, manyandang saruang bugih. Obuak-e lah baguntiang.
“Coga tuen mah, barambah tabiang tu,” kecek Tan Tembang.
“Ang buek an lague ciek ancak mah. Judulnyo ‘ari ka rayo obuak baguntiang,” kecek Pakiah mamulai kucikak.
“Takana dek den dima baguntiang tuen tadi, salon?” Tembang batanyo lo liak.
“Buek an lagu ciek, mada,” Pakiah mahariak.
“Bekolah, sasak bana mah,”kecek Tembang.
“Soal rambuik den jan diurus. Itu ha, rampok tigo satangah em tu, lah dapek urangnyo? Lah ijok se? Mati mancik dalam lubang?” Kato Pasa.
“Jan sak wasangka se Pasa, polisi sadang bakarajo,” kato Malano.
“Wakden kan batanyo, Malano main pangkeh sae. Kan buliah batanyo mah, kok ndak buliah lai. Sajak bilo tu?” jawek Pasa.
“Yo alun dapek lai, wee lah cigin, lah jaleh dek Pasa?” Kato Malano.
“Yo jalai tapi baa alun juo dapek lai?”
“Ma tau den, wakden mabuak,” kato Malano.
“Kabae polisi agak susah ma-ungkap,” kato Tembang.
“Dari sia dari mah Tembang tahu?” Tanyo Pakiah.
“Badatak ati den mak Pakiah.”
” eee cangkua maja, asa ka malambai se Tembang mah,” jawek Pasa lo.
” Pariauk pasuak, tapi bi batanyo tu dek jawek, bakecek an lo den cangkua maja,” kato Tembang.
” Kini nan hoak-hoak panjaro tantangannyo mah, elok-elok ngecek,” kato Malano mampatakuik sa isi lapau.
“Malano ancak aniang,” kato Pasa.
“Nan aniang rampok tigo satangah em, mungkin kini paja-paja tu sadang lalok-lalok di hotel di Jawa nin,” kecek Tuak Bilang nan jak tadi mengulek-ngulek se.
“Yo ndak,” kato Pasa.
“Di Jawa wee, ba pesta pora, lah diparoknyo mah piti tu, ilang. Gak ampek taun sudah tu nyo baliak liak,” kecek Malano lo liak.
“Kok tibonyo di lapau ko baa?” Pasa batanyo
“Den mintak lu jatah den,” kecek Bilang.
“Den imbua polisi,”kato Tembang.
“Saratui ponten Tembang. Malagu lah lai, beko den ampok jo tarompa ko,” kecek Malano.
Indak lai samalam tu curito indak soal rantau doh tapi tantang parampok nan alun tatangkok. (Malin Kapalo Koto)
Baca Juga :
Berani Komen Itu Baik
