Aah banomor capres cawapres wak kini. Duo se nye nomor satu Pak Jokowi jo Kiyai Ma’ruf, nomor duo Prabowo jo Sandi.
“Nyo pendukung-pendukung ko pakai bacakak bakaruak arang lo ko ndak?” Batanyo Pasa ka majilis lapau simpang.
“Baa katuju dek Pasa?” Manjawek malah Malin.
“Bukan baa katuju tapi baa sabanahe?”
“Kalau itu yo indak obeh dek den de Pasa,” kato Malin.
“Randah antene pulitik Pasa jo Malin mah,” sabuik Kuriak Batuang nan lah mamasan kopi paik jo goreang pisang rajo sagadang langan.
“Kuriak lai tarang utak mah, co lah uraikan ciek. Rang lapau teh sariang ciek, kacang padi angek samangkuak,” kato Pasa.
“Wak den teh talua ciek, katan jo goreang tu baok kamari” kato Malin.
Sambia minum pagi, ari dingin, hindangan angek, rang lapau tarui bacarito soal nomor 1 jo nomor 2.
“Dek Pasa sia katuju jadi presiden?” Kato Tuan Baralah.
“Dek den? Sumbarang sae.”
“Dek den Pak Jokowi,” kato Malin.
“Kalau dek ambo Prabowo,” kato Tembang.
“Kalau dek Guru salek sia katuju?”
“Sia nan ma angkek den jadi p n s, kini wak pai lu, maja cah, “kato Guru pai kalua lapau.
“Nan heran den, manga pendukung nomor 1 jo nomor duo ko bakaruak arang tarui se?” Batanyo lo Malin liak.
” Itu nan den tanyo cako, indak bajawek, kini batanyo lo liak, ee simbabau ye,” kato Pasa.
“Manuruik analisa den, dek kurang karajo,” kecek Bilang.
“Kalau menuruik ambo nan ketek ko, dek uru-uru se,” sabuik Tembang.
“Sabanahe ko manuruik wakdeyen yo dek pangaruah media sosial se nye. Sabana banyak upek di medsos tu, indak tamakan dek anjiang lai,” kato Pasa.
“Tu nan bana,” sabuik Kuriak Batuang.
Samo baganti-gantilah majilih lapau saliang ma agiah pandapek. Intinyo, usahlah awak bakaruak arang indak ado gunoe doh. Pengetahuan soal pulitik indak bara lo doh, onjak nan labiah.
“Kalau pagi ko minum wak dibayian dek timses calon wak tagak jo inyo mah,” kecek Pasa.
“Ha ha ha ha, murah mek,” kecek Malano. Lapau simpang sapagi tu bubar, wee pai karajo lai. (Malin Kapalo Koto)
Baca Juga :
Berani Komen Itu Baik
