” Buruak Manuang Kiah?” Gindo mancubo bakucikak.
Kencong se galak Pakiah.

” Sabana marisau ari rayo ko ndak Kiah?” Manyolang kapalo arak, Yuang Pasa.
Nan Pakiah masih aniang.

” Taibo ati wak sabanahe kini mah, urang rantau tak bi pulang,” kecek Malano dari suduik.

” Awak yo taibo lo, biasoe lai banyak THR kini ais sadoalahe,” Tembang sato pulo.

” Ko nan surang ko tehaer se pangana-e lah co iko nagari,” kato Tuak Bilang nan sajak tadi aniang sen.

” Waang Tembang, bagadang ati se,” tambah Gindo.

“Jan salah samek mamak-mamak lai, THR tu kan ado ekonomi iduik, kini sagala tasakek, manggarik se ndak bisa, baa wakden ka babini kalau mode ko nagari,” jawek Tembang.

Pakiah nan tadi tamanuang, tasambuah galaknyo.

“Yo bajaso ang sato mangecek Tembang, badak jantan lah tasambua galaknyo,” kecek Malano.

Pudin, parantau dari Rengat, nan bisa pulang tangah malam buto, nan kini duduak di lapau simpang, sanang atie. Raso lapau lah lamo ilang deknyo. Kini basobok baliak.

” Sanang ati den duduak di lapau ko,” kecek Pudin
” Din baa kondisi di rantau?” Batanyo Pakiah
Pakiah kalau ndak galak, bawibawa bana. Kalau galaknyo sato lo urang galak.

” Alhamdulillah Mak Pakiah, galeh lai baketek-ketek,” jawek Pudin.
” Apo galeh Din?”
“Kini barang mudo, Mak”

Pakiah mulai mengecek. Urang siak nan suko bagurau ko, tahanyak bara ari ko, sabab corona mambuek urang banyak takuik ka musajik. Pemerintah malarang pulo kalau daerahnyo babahayo. Corona ko capek manularnyo.

” Lai koyun?” Batanyo Pasa.
” Yo nan namo barang mudo, Mak, rasaki harimau. Kadang dapek untuang gadang bana, kutiko lain balambin.”
” Namoe se manggaleh,” kecek Gindo.
” Kawan-kawan wak sinan baa? Pudin dek lai bisa Pudin pulang?”
” Yo Mak Malano, awak akai sajo nye, lah tarogak bona wak pulang, amak lah tambah gaek juo. Kawan-kawan ado nan lai barasaki, banyak nan indak, baa ka pulang, duo palang pintu ko, corona ko piti nan tak ado.”

Dek Pudin perantau nan bisa pulang, dek lai dakek, jadi bintanglah nak rang tu di lapau simpang

Maota jo Pudin agak rianglah hari Pakiah kini. Pakiah mamasan sagaleh kopi, alah taragak liau. Saisi lapau ko hanyo Pakiah, bisuak nan ka puaso anam. (Malin Kapalo Koto)

The post Rirayo, Buruak Manuang Pakiah appeared first on Prokabar.

Kapalo arak, kanai nasihati. Manakua nak rang ko. Bantuak dipareso Pe-es, penilik sekolah zaman Mendikbud Sjaried Thayeb.

“Baa rasoe, mada juo lai, kuncun dek liek,” kato Gindo ka Pasa.

“Jan mengecek juo lai, awak sadoalahe bi pucek den liek, baa kok wakden se nan kanai tumpalak?”

“Tapi sinan kapalo arak, ilang kapandaian Pasa den liek hahahaha” kato Malano manyolo.

Di lapau nan sadang rami itu surang Malano dan salamaik sabab inyo lai manutuik muncuang jo iduang pakai kain saruang.

Nan satangah salamaik, Tuak Bilang, pakai masker, tapi di dagu.

” Pak tu namoe masker dagu nah, ancak indak,” kato Kapolsek. Tagagau Tuak Bilang. Tadi wee ka ma agiah kopi angek ka rombongan nan tibo, tapi tasuruik, dek kanai peringatan.

” Wakden lai baok masker tapi balatakan dalam saku,” kecek Gindo.

” Sabanahe ko Mak, masker tu wajib dipakai mah, urang dek nfluensa se bisa pindah-pindah, kunun lai korona, ko wabah mah Mak, jan anggap enteng, ba bapak anak ka urang lain beko,” kato Yuang Tembang.

” Ndak sekadar ba bapak doh Tembang, di koi awak, paja tu lalok, sadang awak lah dalam kubua, nyo kamban urang rumah ko, hahahahaha, “ kecek Yuang Kuriak dari suduik.

“Yo tu takana dek den mah, bi patuah lah wak lai, kok bagak wak surang-surang, indak lo rasoe doh,” kecek Gindo.

“Kurang aka,” tembak Yuang Pasa.

” Hahaha yo itu bacupak ciek,” kato Tembang lo.

“Gilo mambulintang se, aka kurang, karajo bagalumun kain saruang sen,” tambah Malano.

Indak lai dunsanak, sajak kanai razia tu yo lah bi lakek maker nak rang ko.
Angku Palo lah ma umumkan pulo. Dibantu dek imam musajik malewakan.
“Mulai ari ko awak harus pakai masker kalau indak, ijan ka musajik.”

Bitulah tu kini, urang nan kanai korona batambah banyak. Ngilu-ngilu asam awak dibuek-e (Malin Kapalo Koto)

The post Korona:Ba Bapak Anak Ka Urang Lain, Lai Talok? appeared first on Prokabar.

“Yo lah Kia, kok bitu lo kecek Pakiah, manyarah molah kami,” jawek Yuang Pasa.

Yuang Kuriak nan duduak di suduik sanjo kapatang, ma angguak-angguak balam.

“Bantuak balam jinak Kuriak tampak dek den,” kato Pasa.

“Biati den jo Pakiah ko, urang mahabihan pancarian salamo puaso, wee mandapek,” kecek Kuriak.

“Ha ha ha….jan sagalo ka diurus Kuriak.” Semba Malano.

“Ndak ma urus doh Malano, mengecek se ndak lo buliah?”

“Bae taruih Kuriak, den di belakang,” kato Gindo.

“Jan ma adu-adu urang se karajo baa nye,” kato kapalo arak, Yuang Pasa.

“Yuang, ancak aniang, pado den ampok jo boto paniaram ko.” Kecek Malano lo liak.

“Kok ka bacaran siko bae lah, tapi boto den jan dihampehan, babayia utang,” sabuk Tuak Bilang, sambia menyorongan laci piti.

Pakiah memang ndak bisa ka lapau mode biaso lai, sebab liau ma agiah pangajian Ramadhan dari nagari ka nagari.

Ilemu ugamo-e paguno dek umat, jadi inyo diundang untuk ma agiah pangajian Ramadhan.

“Sabulan ko mintak manas ambo ka majilih lapau, kok ado ota lamak, kaba-kabaan juo,” kato Pakiah.

Pakiah baharok ka kawan-kawannyo supayo puaso jan umpang. Taraweh jan lalai, mangaji jan tingga.

“Danga pengajian ustad, awak lah bi baun tanah surang-surang, kok payah mati bisuak, tasakek angok tu, den lah mangecek an, tugas den lah salasai,” kecek Pakiah.

Pado tamanuang majilih lapau sakutiko. Taraso kecek Pakiah cako.

“Kan awak lai lun baun tanah lai kan Mak,” tanyo Yuang Tembang.

“Waang yo muda matah baru, tapi den caliak sumbayang acok tingga, karajo ang gilo bagitar ka bagitar se, ma intai anak gadih urang, nan babini alun juo lai,” kecek Pakiah.

“Tembak 12 pas, rasoanlah,” kecek Kuriak.

Bitulah sa sanjo ka kapatang, menjalang mugarik. Indak lamo antaro e majilih lapau basugiro andak ka musajik.

Nan Pakiah cigin lakeh, sebab wee sasudah mugarik ka pai mengaji. (malin kapalo koto)

The post Pakiah Mulai Indak Ka Lapau Simpang appeared first on Prokabar.

“Dek apo Tuen Buyuang ko, bantuak lipeh tapanggang se?” Batanyo Yuang Tembang
“Jan mamakak juo Tembang, beko den ampehan gitar buruak ang tu.”
“Bato, berang se mah.”
Majilis lapau pagi tu tagalak.
“Bae goreng angek ko lu Yuang, sudah tu kok ka marabo, ndak baa doh,”kecek Malano.

“Malano aniang, beko den kabek-an ka tonggak,”kato Pasa sambiak galak tasengeang.

“Dek Yuang Pasa risau se, kalabu se muko tu, jalehanlah,” semba Gindo.

“Ari ka puaso, anak wak ndak buliah pulang.”
“Dulu kan ndak buliah juo mah,” kecek Gindo.

“Dulu yo ndak buliah,tapi ado bus. Kini ndak buliah, bus tak ado, patabang tak ado,” jawek Yuang Pasa.

“Ko kan dek ado barado Yuang, kok indak, suko ati wak se nye. Malah, perantau tu bana nan ndak pulang. Alasan agak paik iduik di rantau. Jadi a nan Pasa risaukan bana?”

“Tuak Bilang dek lai mah, co lah mode kami-kami ko,”jawek Pasa.

“Manga lo Tuak Bilang nan dibae, apo nan inyo kecek an kan batua tu Pasa,” tambah Yuang Kuriak.

“Kan jalai dek Tuen denai tu, Yuang Pasa nan gadang basa batua,” kecek Yuang Tembang lo.

Pagi nan dingin itu, mode biaso,Yuang Tembang balagu, nyo mainkan gitar gaeknyo tu. Lagu Yuang Tembang, “Pulanglah Uda.”
Sajak basajak ko, sajak corona jaek ko,lah labiah sataun ndak lamak duduak di lapau lai. Kadipakai masker, angok sasak, indak kadipakai,awaklai ngilu-ngilu asam juo stek. Samulo anggap enteng se, rupoe ado nan kanai, sajak itu lapau simpang agak langang.
Kini dek alah lamo, ado nan lah bavaksin bagai, lapau simpang lah mulai rami liak. Kapalo arak, Yuang Pasa, baru tibo sapagi ko. Sakali tibo, sakali muram se muko-e itu. Kiroe wee takana anak di rantau nan lah pasti ndak ka pulang.

“Urang kini main transfer se nyo Tuen Yuang Pasa, ndak paralu bagai basobok doh,”kecek Tembang.

“Ang kiro taragak bisa dibayia jo piti, makoe kecek den babinilah lai, mada, hahaha,” galak Yuang Pasa sangenek senye, tapi majelis lapau tasumbua galaknyo.

Lapau simpang ko yo rami kalau pagi, majilis lapau mamasan kopi, teh talua,kacang padi,goreang pisang rajo. Sagalo angek pagi tu. Ado nan datang membali diungkuih dibaok pulang.

Lah ampia jam 9 lapau mulai langang, Yuang Pasa malucuih pai. Ka rumah, inyo ka pai ka pasa jo Gindo, manjapuik piti jua lado. (Malin Kapalo Koto)

The post Yuang Pasa Kapiradan appeared first on Prokabar.

Mancucuak juo kasudahannyo da
Pagi ari awak mancucuak sayang
Di dalam biliak kito mancucuak
Biliak suaro di tps kito”

Hahaha malagu Yuang Pasa, bantuak lagu parno. Sanang atie, bantuak dapek nakan baru.
“Yuang, ancak aniang, bantuak bunyi parian pacah den danga,” kecek Malano.

Yuang Pasa antah baa lah ko, tabik se jongkek-e, ma ajak pai ka tps wee malagu-lagu bagai. Sanang se atie.

“Baa kok sanang se atie Pasa takana dek wak ha?” Tanyo Gindo.

“Apo salah den malagu ha? Lah kanai larang lo kini?” Kecek Pasa.

“Indak ado nan malarang, tapi angek se talingo kami mandanga,” kecek Malano.

” Kok pakai gitar baa nye Tuen?” tanyo Tembang ke Pasa

“Oi Tembang, ancak ang anok, beko den simbek, bisuak wajib ka tps lai jalai?” Jawek Pasa.

“Memang Pasa pengurus partai?” batanyo Pakiah.

“Kiah jan sato,” kecek Pasa.
Pasa balagu baliak. Cucuak mancucuak. Antah lagu apo lah koh.

“Manuruik Pasa baa pilkada 2020 ko? Lai sero?”
“Nan sero kopi angek Malano.”
“Pilkada baa?”
“Bisuak ka tps, jan indak.”
” Kok ndak datang?”
” Ma den tau.”
” Tu manga Pasa badendang-dendang gai?”
” Manga lo Malano berang?”
” Ndak do den berang”
” Yo manga den dilarang-larang”
” Sakik paruik mandanga, suaro Pasa tu ndak sero.”
“Woi, mamakak se,” sanggah Tuak Bilang.
“Yo bocan den,” tambah Pakia.
” Lah 7 kali sawah tagadai, nan nasib mode ko juo nye,” semba Kuriak.

” Ko bukan soal sawah Riak, ko soal cucuak mancucuak dalam biliak suaro nan ndak buliah basuaro,”Pasa bakato.

” Tapi baa lun ado nan datang malam ko, minimal mambayia an kopi wak? “ Kato Gindo.

” Makoe den banyanyi kok lai la tibo wee. “
Sadang lamak ma ota mode tu, baranti oto di muko lapau simpang. Ampek urang turun, mangopi urang-urang tu.
Sia tu? Timses. (Malin Kapalo Koto)

The post Cucuak appeared first on Prokabar.

“Brandas atau cucuak per?”
“Brandas lah.”

“Kalau brandas kanai, kaos lampu langsuang malok mah Kuriak,” Jawek Pasa.
“Bato pulo,” kato Kuriak manjawek.
“Pompa lah strongkeng tu, bia tarang liak,” solo Malano.

“Iko nan mambuek susah wak, nan gaek-gaek tamsilnyo nan lamo-lamo se, brandaslah, kaos lampu lah, ma kami anak mudo kini mengarati,” kata Yuang Tembang.

“Makoe jan main ka lapau, umua alun cukuik, mada,” kato Gindo.

“Jan mampatagak juo lai mak, nan gaek-gaek ko bi pulang lah lai, bia kami nan mudo-mudo ma isi lapau ko, nak boneh ota stek, jan gaya lamo juo,” kecek Tembang.

“Oi Tembang, indak ka caruah dek angku doh, barek kaji ko mah, kecek Kuriak.
” Ma nan barek dari truk puso roda gandiang?”
“Bareklah iko lai,” jawel Pakiah

Kuriak bakato: “Bia den urai-an apo nan kanai tu? Sajak basajak Etek Puan mengecek, tasingkok sagalo nan tasaok, nan ndak jaleh alah jaleh, nan jaleh dipatarag, nan tarang dipagalok dek buzer, hahaha jaleh lo dek den buzer ye,” kecek Kuriak.

“Oh itu, kalau itu suai wak mah, lapang brandas,” kecek Tembang.
“Kan lai jaleh den Tembang itu, makoe jan bagitar-gitar se karajo.”

“Den lanjuik-an ha, tukang sorak politik dari istana dan lawan lua istana yo sabana bajadi-jadi, siang malam, mode kincia, ciek naik, ciek turun, tagantuang gadang dan kancang air nan mamuta roda kincia.”

“Sajak bola Tuan Pakia baraja politik?”
“Wak den ko sabanahe tikam tuo mah Tembang, ndak mode angku doh, rarau gadang jo tontong,” kecek Pakiah.

“Dima Mak baraja politik?”
“Makoe den kecek an, jan naik bau ang tu, ko Kuriak ko mah, jaleh dek den peta politik bangsa ko hahahah,” kecek Kuriak.

“Oi Tembang, kasus Puan tu sabanahe kan inyo nan ndak peduli jo Minang ko, tasintak lalok e sasudah gampo rayo di tipi i el ci tu. Ciek lai, urang awak sok-sok pantang tagisiah, padahal ndak paralu sensitip bana doh, apo lo tu, padia selah, nan pantiang kini, baa urang bisa sehat, ko copid nagari kini mah.”

“Indak bisa dipadia-an doh Kuriak, salah angku mah, den simbek beko,” kato Pasa.
“Salah lah baru, kalau bitu,” kecek Kuriak.
“Kalau dek den iyo paralu dijalahen mah,” kecek Pasa liak.

“Kalau den caloak banyak lo nan berang sabab urang Minang asik se mancaliak ka balakang,” kato Gindo.

“Dek lai mah Gindo, kalau indak ado nan ka dicaliak ka balakang, yo tapaso aniang. Balakang indak, muko indak. Indak usah lo suku bangsa lain berang ka awak nan mancaliak ka balakang, kan dek ado ka dicaliak.” Kecek Pasa.

“Yo lo ye, nan jaleh brandas lah lapang,” kecek Tembang.
“Yo hahaha, minyak abih, lapang surang se brandas tu mah,” kecek Kuriak.

“Menuruik den sebagai suku bangsa Minang, awak ko buliahlah salut ka masa lalu wak, tapi awak nan iduik kini harus mambuek sesuatu lo sahinggo urang salut lo liak, tangguang salut, wak buek tiok 15 tahun salut ko baa?” Tanyo Tuak Bilang.

“Suai tapi banyak saketek tagantuang gubernur, kalau wee mahagham je, anguik parandangan dibuek e,” kato Tembang lo.

“Koatilah, brandas ka brandas, ko listrik lun bayia lai ha,”kecek Malano bagageh pai.
Bitulah sapagi tadi di lapau simpang. (Malin Kapalo Koto)

The post Kanai Brandas Wak appeared first on Prokabar.

“Gindo a tu?” Batanyo Malano.
“Bank mancetak piti baru Rp 75 ribu, tapi untuak caliak-caliak se,” kecek Gindo.

” Ancaklah bini wak caliak-caliak lai,” semba Pasa.

“Piti baru pacahan 75 ribu tu untuak ma ingek an kito alah merdeka 75 taun,” tambah Tembang.
” Santiang,” kecek Malano.
“Sia nan santiang?” Batanyo Pasa.
“Bank,” jawek Malano

“Indak Tembang doh?”
“Paja ele mah Pasa,” jawek Malano

Galak urang sa lapau dan Tembang galak lo.
Iyo lah 75 taun awak merdeka, tapi manuruik Yuang Pasa, banyak rakyaik Indonesia nan mangaku alun merdeka. Pemerintah indak ma urus rakyaik.

“Kalau manuruik wakdeyen ko ha, manga pemerintah ma urus awak, awaklah nan ma urus awak, urang lain baa bisa? Baa manuruik Pakiah tu?”

“Tu lah Pakiah bana nan mangecek mah,” kecek Malano.

“Kan alah dibantu pemerintah mah manyadiokan jaringan internet contohe, tu mah lah badagang onlin mamak-mamak kini.”

“Yo Tembang tapi pupiak jo pestisida masih maha.”

“Kalau itu suai wak Mak, yo maha, alun tapikia dek pemerintah mungkin lai.”
“Jadi a gunoe piti 75 ribu baru tadi?”
“Hahaha tagiah mah Gindo”
“Santiang Pasa. Bara utang rang lapau?”
“Kalau jo minum sajak 3 ari lalu jo rokok gai, ganok 75 ribu, Gindo” jawek rang lapau.

“Pas, sonsong 25,” kato Gindo.

“Pas se 75 ribu ye, santiang baretong urang lapau.” Kato Pasa. Galak rang lapau sambia mancoret utang Gindo. (Malin Kapalo Koto)

The post 75 Ribu appeared first on Prokabar.

Yuang Pasa bantuak dapek adiak baru, gilo balagu-lagu sajak tadi, kopi angek lupo we-e ma wai.Lupo jo kawan-kawannyo nan sajak tadi taheran-heran.

“Dek a Yuang Pasa, dima tasapo tadi ko hoi,” kecek Malano.

“Indak tasapo gai tu, ka dapek adiak baru mah,” samba Pakia.

“Jan eboh juo surang-surang, balagu urang eboh, aniang urang eboh, dek apo awak surang- surang? Kamari tak elok se,” jawek Pasa.

“Lagu Indonesia Raya Tigo Stanza lai dapek Tuan Pasa?” Batanyo Yuang Tembang sambia mamatiak gitar.

“Jan den lo diago soal Lagu kebangsaan tu lai, satu stanza tigo stanza dapek mah, Proklamasi, Pembukaan Undang-undang Dasar ampek limo dalam kapalo. Kami sikolah dulu indak mode angku doh Tembang, malagak-lagak se,” kecek Yuang Pasa.

“Batua Pasa, indak amba mode Tembang ko doh,” tambah Gindo.

“Cubolah Tembang kok yo saanting, baelah tiga stanza tu, kan lai pakai gitar mah, ebat lo lai.”Kecek Pasa.

Tamanuang Tembang, dek inyo yo ndak dapek lagu kebangsaan tigo stanza tu doh. Nan satu stanza se, kalau ndak samo-samo ndak dapek lo deknyo doh.

“Baa ilang aka?” Kecek Pasa.

“Angkek tangan den Mak,tigo stanza indak hapal doh.”

“Makoe kudo tuo jan diago,lai jaleh tu?” tambah Pakiah sambia tagalak.

“Nan mudo-mudo matah ko alun lai, batandiang nasionalisme namuah den mah,”kecek Pasa.
“Jan ragu lai ye ndaak?!” Tambah Tuak Bilang.

“Bato pulo,” jawek Pakiah.

Tembang nan anak mudo mati kutu, tapi sabanta se nye.

“Jan malagak lai nan tuo-tuo ko, lah batandiang lagu-lagu wajib awak lah, sia manang, perai minum sabulan. Hanyo ado juara satu.Indak ado juara duo gai doh, sia lanteh angan, wak mulai kini langsuang,”kecek Tembang.

“Hahahaha den yo lah banyak lupo, anta kok mandanga di tipi, bisa dapek dek den,”kecek Pasa.

“Sia nan lai tageh, maju!” Tembang tambah basumangaik.

“Dek Tembang lai dapek tu? Kok lai langsuang selah jadi juara satu sakali, bia kami bayian minum tiok pagi salamo sabulan, tapi fee galeh onlin-onlin indak dapek lai, baa?”

“Tu nan kalamak dek awak surang-surang se mah, ko fee minggu lalu alun basetor lai, dalam 24 jam kalau indak disarahkan ka bakeh wakden nan satiang bagitar ko, mako onlin-onlin tu den tutuik, nan busuaklah sayua wak tu surang-surang,”kecek Tembang.

“Hep, indak buliah bitu doh Tembang, kok ndak dek Tembang nan gagah perkasa ko ha, indak dapek gai kami menggaleh onlin doh. Jadi jan ditutuik.” Kecek Gindo.

“Bitu selah, minum sapagi ko den mambayia,”kecek Tuak Bilang.

“Indau den,” jawek Tembang.

“Tu baa nye dek Tembang?”

“Sabulan.”

“Tu memeras namoe mah,” kata Malano.

“Tu hak gue, gue yang bisa onlin di sini, mau ape?”

“Lah kanai lo nyo baliak, lunggu mor nyo Pasa….”

“Hahahaha, mor Tembang lungga,”kato Pakiah.

Tagalak gadang urang salapau. Dalam galak, Tembang mamatiak gitar, nyo cubo malagu. Lagu Mudiak Arau.

“Yo santiang Tembang ye, walau tigo stanza indak dapek, tapi jadi juo lah, indak sio-sio awak balian paja ko gitar,”kata Pakiah.

“Jo piti bapaluah babali gitar ko mah, Mak. Indak ado nan sato manolong ko doh,” jawek Tembang.

“Tu baa, kadibalian gitar baru ciek?”Batanyo Pasa.

Galak lo sa isi lapau liak.

“Jan ma ingkek-ingkek Mak, dek bi lai surang-surang mah”
“Tembang ko yo santiang, kok indak dek inyo indak bisa wak manggaleh onlin doh.”
“Itu gunoe wee awak sikolahan hahaha….,” kato Kuriak nan sajak tadi aniang-aniang se.

“Babunyi balam tuo, tapi sakali se, baa Kurik? Damam, kanai korona lo ndak?” semba Pasa.

“Korona-korona juo, tapi awak surang-surang indak mamakai masker, badoa minta sehaik tiok sabanta ka Tuhan, apolai Pakiah, tapi ingkar indak pakai masker,” kecek Kuriak.

“Suaaiii, itu bananyo, doa kancang, bakarajoan indak.” kato Tembang.

Lapau simpang usai manjalang pukua sambilan, agak lambek sakali ko, sabab apak-apak tu bi latiah ka rimbo ka patang. (Malin Kapalo Koto)

The post Tigo Stanza appeared first on Prokabar.

“Bantuak tapaso se Gindo rayo mah, dek pakai “liak” tu ha,” jawek Pasa.

“Liak tu mukasuik-e, rayo puaso lah talawet, langang pukek, kini baa kolah,” kecek Gindo.

“Ndak usahlah Gindo mangecek lah, kalau ka salah-salah se,” jawek Pasa.

“Ha ha ha ha, kanai skak Gindo pagi ko,” semba Malano.

“Iyo, asa ka malambuang se, lah jaleh sajak saisuak, rayo haji ko awak pai sumbayang se nye, tu kurban, sudah tu bagi-bagi dagiang,” jawek Pasa.

“Manuruik den, lah duo kali rayo, nan corona ko alun juo pai lai,” kecek Gindo.

“Baa ndak itu se bakecek-an sajak tadi?”

“Alun sudah ngecek lai, den lah bapotong se,” jawek Gindo pulo.

“Lah wakden lo nan salah, yo lah baa nyo Gindo selah,” jawek Pasa.

“Rayo dingin, naik aji dingin lo, saribu urang se nye,” sambuang Gindo.

“Nah kan, salah lo liak. Naik haji saribu tu, itulah nan sabana haji, sabana khusuak, lieklah dek Gindo di tipi kalau ndak cayo.”

“Ha ha ha ha salah lo liaaakkkk,” kecek Tembang, sambia maraguak kopi pagi tu.

“Tembang ang parkir lu, danga urang gadang mengecek,” semba Malano.

“Tembang lo kanai lai,” tambah Kuriak.

“Ha ha ha, kamari bedo se sadoalahe mah,” jawek Tembang.

“Den raso, awak-awak ko ancak aniang se, ota nan lain se lai. Indak usah sok tau soal corona ko, lah diagiah lokak dek tembang pakai onlen-onlen tu, sabana badacak jua bali, mangaluah juo lai.” Kecek Pasa.

“Pasa ko yo dangkek bana agamo-e taraso dek den lah, baa gak ati Pakiah tu?” kecek Gindo.

“Ha ha ha ha Pasa lo kanai lai, ugamo Pasa nyo kecek-an dangkek dek Gindo, amuah tu, aniang sen?”

“Pakiah, jan ma adu-adu urang lo, kok ka mangaji, bae lah sa aungguak pagi ko, bia den danga lo lacuik tangan Pakiah tu di lapau ko, jan barani di surau sen,” jawek Pasa.

“Kalau Pakiah diminta mangaji samo jo manyuruah garin ka musajik mah, menyuruah tentara babarih,”kato Malano.

“Ugamo jan dipagarah-garahan yo, bi bakundo masuak narako surang-surang baru tahu,” kecek Pakiah..

NahA majilih Lapau Simpang dibuek-e.

“Danga yo. Rayo Haji ko, kutiko urang naik haji sadang di Mina, abih bacukua abuak-e. Liau-liau tu abis malontar Jumrah. Sadang kurban ko, lambang kerendahan hati wak, sabab saisuak bana sangaik, Nabi Ibrahim dakek Arafah tu, disuruah Allah mendabiah anaknyo. Wak tahu mah, dituka dek Allah jo domba. Awak-awak ko, rokok se ilang sabungkuih, itam muko tu, baturo-turo. Dek Nabi Ibrahim anak, santai se liau-nye. Anak e Nabi Ismail, santai se lo nye. Manyarah bulek-bulek ka Allah, dek pasrah mode tu, nyo tuka dek Tuhan jo domba. Itu nan awak paringeti kini. Jadi ndak usah ceke bana iduik ko lai, ndak usah pura-pura alim. Alim yo alim, kalau alun, akui se alun.” Pakiah baranti ngecek.

“Mak Pakiah, tibo-tibo piti ado, wak ingin naik haji, umua lah 55 tahun, manunggu lo dulu 20 tahun, kan agak payah tu Mak, kok ndak pai urang mode tu baa Mak?”

“Itu baru kaji mah Tembang. Kini ang mendaftar haji, piti kan lah ado tu, kan ndak harus lunas kini doh, kalau lah gaek mode-mode kami ko, lah anyuik labu mah,” kecek Pakiah.

“Umrah se Mak,” jawek Tembang.
“Sudah kolah, bia badagok jua bali onlin-onlin nan Tembang buek tu lu, pai wak samo-samo.”

“Tu amuah tu Pakiah, baru kerek den,”kecek Pasa.

“Den sato lo,” kato Malano.
“Bato pulo, sayah sata satu,” Gindo manyolo.
“Wakden iya pulalah,”kata Tuak Bilang.
“Kalau mantun, catatkan namo wak baduo jo rang rumah,” kato nan Lapau Simpang.

Samarak Lapau Simpang sapagi ko, ka bi mandaftar umrah nak rang tu. Baa ka indak, jua bali onlin wakatu kopid 19 ko mambubuang. Iko ulah Tembang, nan ligat mambuek-buek onlin tu, tabantu mamak-mamak-e sadolahe.

“Tapi takana dek den, babini bilo Tembang?”
“Tuan Pasa carianlah, batanyo ka batanyo se,” kecek Tembang pulo.

Bitulah sapagi tu, ba niak urang-urang tu pai umrah. (Malin Kapalo Koto)

The post Galeh Laku, Umrah Ciek Lu appeared first on Prokabar.

“Kagak masalah itu, kita aja yang lebay.”
“Eee yayai, lah malagak lo paja ko.”
“Salah makan mah,” kecek Yuang Pasa.

“Sia salah makan?” Semba Gindo

” Nan salah makan, Tembang”
“Kalau manuruk den nan salah makan, urang nan ma urus sistem masuak sikolah kini ko.”
“Oi pado bajalan di dalam kalam, danga, bia wak uraikan, supayo duduak bola tu,” kecek Tembang menyolo.

“Males gue,” jawek Gindo
“Ha ha ha ha,” galak Tembang, nan lain galak lo.

“Baa cubolah, kok yo lo,” solo Tuak Bilang.

“Biko ha, paratamo, nagari wak ko kan cubo-cubo, apolai untuak urusan sikolah. Sajak mamak-mamak mudo matah dulu lai, ado-ado sen na batuka, jan kan caro, namo se baganti dari sma ka smu ka sma lo lik, a gunoe dek mamak tu, tagiah-tagiah se.” Kecek Tembang.

“Nan kini ko ha apo masalah, jan nan lamo-lamo tu juo.” Kecek Pakiah sato menyolo.
“Dangalah dulu, sasuai rukun jo taratak, nan da-ulu didahulukan, nan kudian, di balakang.”
“Waang yo sabana jongkek Tembang,” kecek Pasa.
“Kabataruihan indak ko?””
“Yoooo”
“Patang-patang tu anak masuak sikolah, jo nilai, nan tenggi nilai-e bisa masuak sikolah favorit, antah apo lah ko nan paporit, bantuak tukang sulap lai lo pemerintah awak ko.”
“Aaa tu?” Tanyo Gindo

“Kini ndak paporit tu lo lai, ndak nilai lo lai, tapi umua harus pas, mode bauik jo mor, nan lakeh masuak sikolah, tamaik sudah tu ka manyambuang ke smp atau sma, mbek cah lu, saba, daulu-kan nan umua pas. Nan labiah tuo, sabulan 11 hari misalnya, saba lu, baa kok lambek na masuak sikolah.”

“Jadi harus awak ukua bini hamil jo umua sikolah?”
“Ndak bini hamil se de Gindo, ka manikah bagai tu mah, harus wak tanyo ka dinas pendidikan, bitu, Tembang?” Batanyo Pasa.

“Hahahaha iyo.”
“A lai Tembang?” Tanyo Bilang.
“Zonasi.”
” Apo lo tu?”
“Karambia mudo bapanehan, hahahahah….”
“Tembang kalau indak tau, jan bakicau,” kecek Pakiah nan indak saba.

“Pasang talingo kuali wak tu surang-surang, sakali lacuik, indak ka diulang-ulang. Zonasi ko mukasuik-e jarak ka sikolah, paliang jauh sakilo, labiah dari itu, jan diharok bisa ditarimo.”

“Eeee kudo basin, a lo tu ha,” berang Gindo.

“Yo bitu lo, sabanahe di lua nagari biaso se nye tu Tuen, tapi di awak, ganjia sabab jumlah rumah sikolah, sangenek, jarak jauh dari rumah, tapi yo bitu nan tajadi kini, ambo lah ngecek jo Jokowi, anak-anak ditarimo di sikolah, tanang selah.”

“Jan malanguah juo Tembang, alah tu muak den mah,” kata Gindo.

“Sasek makan pemerintah ko mah, ado2 se nan hyo urus, ancak la ladang den lai, kopi den lah mulai babuah, sudah ko diekspor ka Eropa, kopi robusta, nan pamaleh karajo den agiah saganggam,” kato Yuang Pasa.
Nan lain bi tamanuang se. Ma uru sikolah ndak beres, nan Pasa lah ka ma ekspor kopi se. (Malin Kapalo Koto)

The post Kudo Basin, Salah Makan appeared first on Prokabar.

“Jan mengaluah ka mangaluah se Gindo, nan sensa ma urus anak, indak Gindo se doh,” kato Malano.

“Bantuak inyo se nan baranak, urang baranak pulo mah surang-surang,” tambah Yuang Pasa.

“Hepsss ambo alun baranak lai Mak,” kecek Yuang Tembang.

“Ndeh paja ko lah sato lu, gayuik-anlah baju di dapua, bia tau amak jo abak, Tembang minta dicarian bini, sudah tu baru baranak,” kata Tuak Bilang dari sudut, sambia mengocok teh talua. Teh talua lapau simpang sabana sero.

“Danga kecek den lu, mamasuak an anak sikolah kini susah bana, pakai-pakai zon pulo, nilai, prestasi, ado soal umua bagai,” mangaluah Gindo.

“Yo den danga mode tu lo, lai ado juo caro mampasulik rakyaik lai, diaka-i juo dek pemerintah ko,” kato Pasa.

“Zon-zon ko supayo dakek ka rumah mah Mak, indak mampasulik doh,” kato Tembang.

“Dulu sikolah untuak urang kayo se, sudah tu untuk urang babaun se, sudah tu untuk nan punyo dekingan se, sudah tu untuak kerabat se. Anak-anak miskin mode anak awak, urang kampuang, indak sacadiak anak urang kayo kota, dapek sikolah sibiran se lai,” kato Gindo.

” Ko dalam kaji mah Gindo, masuak ke wilayah kayo miskin, kota kampuang, bisa ba urusan Gindo kateh sudah ko mah, “ tambah Pak iyah.

” Stek-stek ba urusan, wakden ko rakyaik Indonesia ko mah, ba ktp, siko lahia den, anak den ka sikolah, bapasulik juo, jan banyak bana lampu-lampu lai, ado-ado se aturan, makoe den berang, sasak angok den, anak den lah manangih jak patang, kama paja ka sikolah lai, “ kecek Gindo.

” Jan lah sikolah umum tu juo, banyak sikolah inyiak-inyiak wak, sikolah etek wak nan gagah-gagah, “ kato Malano pulo.
” Suaaiiiiii, “ semba Tembang.
” A tu sikolah nyo? “
” Mak Gindo danga yo, paratamo ado di Padang Panjang Diniyah Puteri, kaduo ado sikolah di Canduang, Tarbiyah Inyiak Canduang, katigo ado sikolah pesantren, ancak ka sinan masuak an lai.”

“Ondeh yo santiang ang Tembang, tabuka pangana den,” kato Gindo.

“Saran den masuakanlah anak gadih Gindo tu ka Diniyah Puteri, bia ado nan tahu ugamo di awak Gindo, nakan den tu santiang mangaji mah. Kok lai untuang ka elok, bisa nyambuang ka Mesir, bia jadi urang hebat nyo, bia sagan urang jo kampuang wak ko.” Bakatolah Pasa sangkek itu.
Galak manih Gindo, sudah tu kalam liak.

” Tapi den indak ado biaya, piti tu bana nan indak ado, “ kecek Gindo.

” Ado ladiang rang lapau, “ bakato Pasa.

” Untuak apo ladiang pagi ko dek Pasa? “ Kato Pak iyah.

” Banyak gaya bana. Urang nan sampilik bakeh anak, tapi gilo ka lapau se, rokok 2 bungkuih sahari, gilo ma asah-asah batu cincin se, gilo unggeh se, nan panen lado tiok cacah, mangaku indak bapiti untuak anak kanduang nyo, ancak wak catuak se lai, ndak gunonyo ado siko doh, “ kecek Pasa.
Makin tamanuang Gindo. Makin panjang pangana-e. Makin tatunduak se apak ko.

” Kok ndak ado piti, jua kabau tu siku, “ kecek Pasa.

” Yo mah Mak, indak ibo mamak jo nak gadih mak, urang lah bi mandafar we-e alun juo lai. Lah tu, punta lah, pai lah mak barisuak ka Padang Panjang nin.”

“Den tanyo ka inyo lu, lai nio nyo sinan.”

“Lai wak den tahu mah, nyo den caliak sabana rajin ka surau, kan lalu muko rumah den tiok ari anak-anak tu ka surau mah Gindo,” kecek Pasa.

Gindo tagak, inyo malangkah pulang, mangecek an ka anak gadih nyo. (Malin Kapalo Koto)

The post Ado Ladiang? Banyak Gaya Bana appeared first on Prokabar.

Bapantun malayuak-layuak se surang, bitulah Malano samalam ko di lapau simpang, nan lain onok-onok sen, bantuak ndak mandanga. Walau mantun, galak majilih lapau pacah dek ulah Yuang Tembang.

“Cikarau di ulu aie
Diambiak sado nan tuo
Utang lamo wajib dibayia
kok indak usah ka lapau juo”

Tambah ampuah dek galak sabab Malano, maambiak tarompa lily-nyo nan tapak-e licin tu, nyo layangkan ka Tembang, sambia sato lo galak

“Jangan main kekerasan Tuen, kena HAM, nanti saya lapor ke atas, sia ka ma anta nasi, sia ka maantok-an tangih anak bini, ha ha ha…,” makin manjadi-jadi Tembang ko.

“Palasik kuduang, kanai wakden dek paja anyia ko,” kecek Malin.

“Ha ha ha rasailah,” kecek Yuang Pasa nan tapanca aie matoe dek galak.

“Badatak ati den, sabanta lai lapau ko tutuik mah, bangkrut,” kecek Gindo sambia mencaliak ka juragan lapau.

Galak lo baliak, nan juragan icak-icak indak mandanga, tapi nyo tampak sadang membaliak-baliak buku catatan hutang.
Majilih lapau sabanahe alah sagan, minum tiok pagi, tiok malam, tapi bayia ciek, utang ciek, ado nan lah tigo kali, alun juo babayia, ndak datang-datang se ka lapau lai.

“Utang jan indak dibayia, badoso gadang wak, ciek lai, batutuik lapau simpang, kama kapalo arak ka duduak lai,” kecek Gindo.

“Gindo nan jadi mamak kapalo warih alias em ka we, batangguang jawablah, jan lapeh tangan se, nagari ko sadang sakik kini mah dek corona,” kecek Pasa.

“New normal Mak,” kecek Tembang.
“Apo tu?”

“Sakali aie gadang, sakali tapian barubah,” kato Tembang.

“Santiang, yo tunyo, tapi pitih kami lah habis ko Tembang, beko den jinjiang talingo Tembang tu lai,”kecek Pakiah menyolo.

“Saba, bia den bukak kincia-kincia mamak-mamak sadoalahe,”kecek Tembang.

“Ndeh, lalu-lalu se muncuang paja anyia ko mah Pasa,” kecek Malano.

“Saba Mak, nio ndak ko, kok ndak wak pai lai,”main ancam se Tembang ko.

“Jadi menah,”kato Malano.

“Begini, simak baik-baik, pasang telinga, lipat tangan, menghadap ke depan,” kato Tembang.

“Ang kecek an anak sikolah kami ko?!”

‘Ha ha indak, awak dek taragak bagarah sen. Biko ha, bia wak tolong mamak-makak sadoalahe, alun talambek lai, wak buekan kios online, sapakan lai paliang lamo salasai mah. A tu kios online? Indak usah mamak-mamak tanyo, beko gilo. Patuah se lah. Mak Pakiah ado talua itiak talua ayam, Mak Gindo ado kulik manih jo kopi, Mak Yuang Pasa ado lado, bawang, langkuweh, bareh, cokelat gai. Mamak-mamak nan lain, apo se, mode karipik kaladi, jariang, patai, tabu, pokat. Sadoalahe, awak jua-an,” kato Tembang.

“Apo tu Tembang, kami jan ang loge lo lai, abak ang tu jo wakden baraja mah,”kecek Malano.

“Kalau Mak mengecek juo, kanai coret, Diam selu. Seluruh nan awak sabuik tadi wak foto rancak-rancak, wak pajang di medsos, wak jua. Bantuan mamak-mamak sadoalahe nan wak paraluan harago jua, harus balabo, sudah tu beko wak etong ongkos kirim. Bahan-bahan tadi untuk kaparaluan rumah tangga dalam kecematan awak sampai ka kecamatan sabalah. Sia nan mambali, wak anta dalam jadwal tertentu, beko awak ma atur. Sabanta se ko nyo, kayo mamak-mamak liak, tingga duduak-duduak se lapau simpang ko lai, tapi jan lupo ka ladang, beko bansaik liak,”kecek Tembang.

“Wakden danga yo ado nan mode tu,”kecek juragan lapau.

“Ape gue kate,” semba Tembang.

Lamo Tembang manjalehan, sampai tamakan dek majilih lapau, sudah tu bi badarah muko-e surang-surang, lah tabayang deknyo hasil taninyo ka tajua.

“Tapi jan ka lamak dek mamak-amak se, untuak ambo 15 persen senye dari sadoalahe nan tajua, idak ado nan perai doh zaman kini ko,” kecek Tembang.

“Suko ati ang, kalau sapakan ko ota ang tu indak terbukti, waang dek kabek-an di tang cubadak,”kecek Pasa.Galak

badarai lo liak sa isi lapau, tapi kini lah tabayang jua bali online dek mamak-amak tu. (Malin Kapalo Koto)

The post Utang di Lapau Lah Balimpik appeared first on Prokabar.

“Sampai dek Malin? Panitahan Malin cako, iyo lah ma ibo, nagari iyolah batuak dialah garudo, Kamari bedo, kalua bedo, di rumah bedo juo, te ha er indak pulo ado, anak marengek kapatang sanjo minta bali baju rayo, den kayay juo ka pasa mambali baju salai duo, dikao mangacak duya ko, sagitu sambah dari ambo.”

“Stop….stop!” Tembang mahariak

“ A nan stop dek paja kaciak ko ha, Kamari madok indak bakatantuan se, bantuak truk kasiak putuih rem,” kecek Pasa.

“Ikolah akibaik-e, kalau indak diaja kutiko ketek sari,” tambah Gindo sambia bagalumun kain saruang.

“Co danga dek mamak nan cadiak candokio, nan tinggi dari pucuak, alun rabah alah ka ujuang, alun pai alah babaliak, bia den urai den curia papahkan ciek-ciek bia nak sanang dalam ati, sajuak dalam kiro-kiro,”kecek Tembang.

“Ang kecek an randai ko, bia nak sanang dalam ati, sajuak dalam kiro-kiro,”kecek Malin.

“Danga nye den, baa kok bano mamak nan ciek ko yo.”

“Jadih menah, cubolah jalehan.”

“Biko ha, salamo iduang di tampuah angok, apolai iduang tuo mamak-mamak itu, iko baru kajadian nagari disapu wabah, ado dulu saratui taun lalu, flu spoanyol namoe. Kini tibo liak, jan napasu babaju baru tu juo di paturuik-an, ba paralat anak. Ko ka pasa cah bali baju untuak anak, padahal inyo satolo mah. Bali kue buek galamai, bali ikan, ayam, ba indang-indangan awak. Basabuik lo tu, kan sakali sataun, bilo lo lai. Mancari maleh, karajo duduak-duduak se di lapau simpang, ladang tak bi manjadi,” kecek Tembang.

“Tembang ang lah bantuak angku palo mah, lalu se kecek tu ka kami-kami ko,” samba Pakiah.

“Danga lu, den lun sudah lai Mak. Kutiko disuruah dek pemerintah meningkek-en ekonomi, wee ba alasan, ladang ndak subur lai dek pupuak lambaw, kok dapek ado jalan ka sawah jo ka rimbo nan bisa ditampuah onda. Dek pemerintah babuek an, basuok-an, ma hambiak-an rumpuik banto, nan awak tatap se maleh. Jalan ka rimbo alah samak, jalan ka sawah lai rancak, nan padi sagitu juo tiok manyabik, nan abih baluik di sawah. Kini tibo rayo musim corona, awak nak basikencak juo mambali baju rayo, untuang ingek. Untuang. Sagitu panarangan dari ambo sabagai jupen nye, inok nanuang-anlah surang-surang, dek mamak-mamak dan gadang basa batua,” kecek Tembang.

Ka berang antah, indak ka berang anta, mamak-mamak tu tamanuang se.

“Baa tamanuang, bajaso den disekikolahan ye?”

“Ha ha ha ha ha”

“ha ha ha ha ha”

“Sakali ko yo santiang ang Tembang, aden se nan pakiah kalah, apolai nan preman pasa mode mamak-amak ang tuha, lah bi tamanuang hahahaha,” kecek Pakiah.

“Indak mode tu bana doh Tembang, wakden lai takuik jo corona, tapi baa manjalehan ka anak den? Indak bisa doh, ang dek alun babini mah, cobolah sabanta lai,” kecek Pasa.

“Itu baru kaji mah, babini lah lai Tembang, supayo jan sok tau juo,” kato Malin Marajo.

“Kok itu kato mamak, sudah rayolah yo, den pa pasa lu, mambali baju gak salai, nan segeh, ari rayo ka pai marenten jo paja tu,” kecek Tembang.

“Eee yayai, baraka manasihati Pasa jak tadi, tumah contohe, wee ka pai bali baju rayo, Yuang Pasa,”kecek Pakiah.

“Paja tabaliak edong mah, awak dicaca e sajak tadi, nan inyo samo lo jo awak, paja sakik.”

“Ha ha ha”

Galak gadang manyudahi majilih lapau sasiang patang, sudah tu bi cigin, ka pasa bali baju, di pasa basobok lo liak, samo-samo galak liak. Pulang sairiang lo jo onda surang-surang. (Malin Kapalo Koto)

The post Co Iko Kini Rayo Yuang appeared first on Prokabar.

“Ko contohe manusia, urang nan nyo urus, karajonyo indak salasai,”kato Gindo.

“Mak Gindo jan kamari malambuik sae, dangalah dek mamak kok indak. Di tipi, di koran, di medsos, di pasa, di lapau, samo se,”kecek Tembang.

“Apo nan dihiruak-an urang?” Batanyo Malano.

“Corona, bansos, be-el-te, pe es be be,” jawek Tembang

“Itu ka itu se bocan den,” semba Pasa.
“Dek bosan tu lah mangko dek baok ka tangah galeh ko, kok lai ka laku.”
“Yo lo mah, sabana hiruak,” kato Pakiah.

“Kalau dek den yo managiah mandanga-e, bi ma adu mato panjaik,adu santiang, itu guno-e pandai mengecek jo manulih,” kato Gindo

“Yolah kalau mantun, paturuik-an banalah, bara talok, sampai tangga sarawa, sampai tangga jari tu, sampai kariang muncuang dek mengecek, bae, pupuah, baa dek Pakiah tu?” jawek Tuak Bilang.

“Kalau dek wakden, ma habih-habih-an ari se tunye.Lah jalai nagari mode ko, awak se lai nan tau surang-surang, usah mahariak mahajan tuah juo, indak ado gunonyo doh,”kato Pakiah lo.

“Kan benar kata saya caka tu ha, tak sia-sia saya sekolah, baa dek Mak Yuang Pasa tu, lai di barih makan paek?” Nyo lapehan pasambahan dek Tembang ke Pasa.

“Ijan den lo ang jadian dekingan lai, kalau mengecek pikua baban tu surang,”jawek Pasa.

“Bato Mak, lah tagak di nan bana badan diri ko ha, indak lo mamak batu doh? Indak paralu suaro den untuak manolong jago mamak dalam pilkada bisuak?”

“Ha ha ha ha ha, suai, catat Tembang, kurang suaro ciek,”kecek Tuak Bilang.

“Jadi menah, den sokong ang, tapi cari 10 suaro lai, kalau lah dapek dek ang, manarimo saketek.”

“Ma amuahe sangenek jeh, sajuta ciek suaro tambah baju kaos, kalau suai, angkek barang, truk barangkek, segala urusan biar ay yang tekel,”kecek Tembang pulo.

“Baliho baa?”Semba Kuriak nan sajak tadi angguak-angguak balam se.

“Baliho lain lo tu, agak gadang tu Mak.”

“Oi Tembang,ang banyak gaya, pokok gitar ciek se nye, anak gadih urang ang hawo, politikus ang jujai, timses ang loge, tapi Pasa jan ang gulai lo, babayia utang tu beko,” nasihat Pakiah.

“Indak ciek juo nan jalai dek Mak Pakiah doh, datang ka rumah beko bia ditarangan urusan politik ko snek ha, baok okok sabungkuih dih,” kecek Tembang sambia galak.

“Yo sabana sadoalahe nan ka dipagalehan Tembang ko, jo Yuang Pasa gai nyo loge juo,” jawek Pakiah.

“Bakirok lah Tembang, kecek-an ka urang nan hiruak di sagalo bukik jo lambah tu, barantilah lai, urang ka rayo, beko abih ari dek gubalo se,”kecek Pasa.

“Indak takao doh Mak, inyo bi santiang surang-surang,” jawek Tembang.

Ari alun lai pukua anam sanjo, tapi urang di lapau lah bi pai, sabab langik lah galok, guruah bakatuntang, sabanta lai ka ujan. Indak lamo antaronyo, ujan labek turun, urang-urang ko lah tibo do rumah, tek baya sadang menyanduak kolak untuak babuko. Lapau simpang sabana sunyi, pintu kadai lah batutuik, urang lapau ka babuko, udaro dingin lo. (Malin Kapalo Koto)

The post Hiruak Sae Nagari Ko appeared first on Prokabar.

“Pasa, jan mode tu, kalau doa tu nan elok,kalau ndak baliak lantun-e,”kecek Gindo.

“Jan ma upek-upek jeh sughang, mahagham saelah di rumah, kamban tek baya itu,”tambah Malano.

“Wakdeyen caliak Pasa ko lah mulai kanai mah, sagalo indak elok se nagari ko di mato-e,” tambah Tuak Bilang.

NanPasa paniang se bagalumun kain saruang, nyo tagak an lutuk-e di palanta, nyo bulintangan lakek kupiah, sambia mancaliak anak bujang mata main catua kabau.

“Tuen Pasa kanai simbabau cako mah,” kecek Tembang, anak mudo nan bakain saruang lo, nyo salempangan saruang tu di bahu.

“Tuan-tuan majilih lapau nan gilo ba utang se sajak corona koh, cubo danga kecek den elok-elok, tagak an daun talingo tu, nan talingo kancah, usah mandanga, sabab gadang se nan lai, tapi pakak,”kecek Pasa lo, jo suaro dingin.

“Lah bantuak pasuruah buterprah Pasa den caliak,” kato Malano menyolo.
“Bantuak sopir Dansek.” Tambah Gindo

“Biko ha, kato pemerintah pe es be be, awak di rumah sae, indak marentan kian kumari doh, sabab virus corona ko, sabana ganas, bisa mati tajilapak wak dibueknyo. Indak ibo jo induak bareh, jo anak, jo cucu, jo kemanakan nan bujang gadih tuh,awak pulang malalah, babaok virus, sudah tu pindah ka urang. Kok mati se langsuang jaleh lo, kok sakik, rarau-rarau-i, oanjek-panjek dindiang. Itu nan den risaukan, indak amuah ditagah, makoe sahabih kaji, koati surang-surang selah lai, nak jangkang surang-surang,” kecek Pasa.

“Pasa deklai tantu iyo, co bantuak kami-kami ko iduik di nan tido, bareh alah abih, kama nasib ka dikadukan Pasa, ka inyiak wali? Bansos se turun e bantuak aira pincuran kariang, satitiak-satiak se,” jawek Pakiah nan sajak tadi, tapaku se mode badak jantan latiah.

“Ko bukan soal lai atau indak, tapi soal menjago kesihatan keluarga masiang-masiang, den ndak ado kuaso malarang tuan-tuan kalua rumah doh, pailah bakisai lah, tapi jan mode itu bana. Snek-snek bakecek-an bansos ndak ado, baa ka makan, yo bana mode itu? Yo lai serius mode itu bana?”
Tamanuang sa isi lapau.

“Den taruihan ceramah ko ha, bia utak nan baku tu paguno dek wak surang-surang.”

“Taruih Tuan Pasa,ko gak dalam kaji mah,” kecek Tembang.

“Manurik deyen, baganti-ganti kalua rumah tu dan indak tiok ari, pakai palampok muncuang tu, masker. Kok ndak ado bali, kok ndak ado, bae jo sabeta, indak juo salang ka rang rumah, ado dek nyo mah. Sudah tu, mandi jan lupo. Tuan-tuan kan bi jarang mandi mpak dek den. Sudah malala tu ganti baju jo sarawa,” kecek Pasa pulo.

“Kans iyo tu dalam pangajian, bantuak bu dokter puskesmas bana Tuan Pasa kini,”kecek Tembang.

“Waang jan mamakak juo Mbang, den lambikan boto kue ko ka kaniang ang baru tahu,” kecek Malano membela Pasa.

“Nah biati den jo Malano sakali ko. Saya teruskan ceramah ya, biar terang otak tuan-tuan semua, hahahahah….”

“Bahaso awak se Pasa,” kato Gindo

“Awak-awak ko suko mengarengkang ka pamarentah, lai tabayang dek awak surang-surang kalau pemerintah icak-icak indak tahu se? Kini lah nyo urus awak, jan malawan juo. Awak-awak ko partamo sok HAM, sok demokrasi, sagalo ka disanggah. Kaduo, awak-awak ko katurunan urang tajajah, sahinggo ado bibit malawan ka pamarentah. Stek-stek dilawan, asa malawan jadilah, pokok-e malawan lu. Itu ubahlah tu, jan mode itu juo.

“Ko ateh dari bu dokter puskesmas mah Pasa,” solang Pakiah.

“Kalau den danga dari tadi, ko bantuak profesor mengecek di tipi,” jawek Tembang lo liak.

“Ha ha ha ha, wak dek ko santiang ko mah Tembang, tenggi sikolah den pado ang. Kini den lanjuik-an sajuwak lai. Karano Pe es be be nan dibuek pemerintah ko nyo saratoan jo bantuan sosial, mako awak bi maradang surang-surang. Wakatu peri-peri dulu, kami-kami ko mandanga Tembang, sabana paik iduik, kini bi ba hape, bi ba onda, ba tivi, di rumah, sabanalah agak sagonjik baa nye, rasaki tu ka tibo juo, kan lai ado bantuan dermawan tibo mah, bareh nyo bagi-bagi, awak kan lai ba usaho juo mah, agak suruik pandapatan, iyo. Samo-samolah awak baru. Basaba, tawakal, tawaquak, basarah diri ka Allah, badoa pa banyak, ingek, barang siapa yang suko mangarengkang, urang dapek da ulu, awak dapek kudian, picayolah jo den.”

“Teng….teng…. teng… sikolah usai, bajaso bana wakden punyo mamak mode Tuen Pasa ko,” kecek Tembang.

“Oi Tembang, lai lamak jantuang pisang mudo dek ang? Kuleklah. Mamakak se, batua tu mah nan dikecek-an Pasa tu, jan marentak mahajan tanah se nan bisa, indak awak se nan ka diurus dek pemerintah ko doh,”kecek Gindo.

“Ndeh, kok adolah urang tipi siko, nyo suting wak mah, sabana boneh kaji sasanjo ko, kini bitulah, dek ari lah barasua sanjo juo, wakatu babuko ampia tibo, nan wakden pai lu,” kecek Malano.

“Samo-samolah wak ma urak selo,” kecek Pakiah.

Bubar majalih lapau simpang sasanjo itu, Pasa, kapalo arak barangkek pulo ka rumahe lai, paruik-e lah bunyi guruah. (Malin Kapalo Koto)

The post Suko Ati Selah Lai appeared first on Prokabar.