“Yo lah Kia, kok bitu lo kecek Pakiah, manyarah molah kami,” jawek Yuang Pasa.

Yuang Kuriak nan duduak di suduik sanjo kapatang, ma angguak-angguak balam.

“Bantuak balam jinak Kuriak tampak dek den,” kato Pasa.

“Biati den jo Pakiah ko, urang mahabihan pancarian salamo puaso, wee mandapek,” kecek Kuriak.

“Ha ha ha….jan sagalo ka diurus Kuriak.” Semba Malano.

“Ndak ma urus doh Malano, mengecek se ndak lo buliah?”

“Bae taruih Kuriak, den di belakang,” kato Gindo.

“Jan ma adu-adu urang se karajo baa nye,” kato kapalo arak, Yuang Pasa.

“Yuang, ancak aniang, pado den ampok jo boto paniaram ko.” Kecek Malano lo liak.

“Kok ka bacaran siko bae lah, tapi boto den jan dihampehan, babayia utang,” sabuk Tuak Bilang, sambia menyorongan laci piti.

Pakiah memang ndak bisa ka lapau mode biaso lai, sebab liau ma agiah pangajian Ramadhan dari nagari ka nagari.

Ilemu ugamo-e paguno dek umat, jadi inyo diundang untuk ma agiah pangajian Ramadhan.

“Sabulan ko mintak manas ambo ka majilih lapau, kok ado ota lamak, kaba-kabaan juo,” kato Pakiah.

Pakiah baharok ka kawan-kawannyo supayo puaso jan umpang. Taraweh jan lalai, mangaji jan tingga.

“Danga pengajian ustad, awak lah bi baun tanah surang-surang, kok payah mati bisuak, tasakek angok tu, den lah mangecek an, tugas den lah salasai,” kecek Pakiah.

Pado tamanuang majilih lapau sakutiko. Taraso kecek Pakiah cako.

“Kan awak lai lun baun tanah lai kan Mak,” tanyo Yuang Tembang.

“Waang yo muda matah baru, tapi den caliak sumbayang acok tingga, karajo ang gilo bagitar ka bagitar se, ma intai anak gadih urang, nan babini alun juo lai,” kecek Pakiah.

“Tembak 12 pas, rasoanlah,” kecek Kuriak.

Bitulah sa sanjo ka kapatang, menjalang mugarik. Indak lamo antaro e majilih lapau basugiro andak ka musajik.

Nan Pakiah cigin lakeh, sebab wee sasudah mugarik ka pai mengaji. (malin kapalo koto)

The post Pakiah Mulai Indak Ka Lapau Simpang appeared first on Prokabar.

“Dek a Yuang, buruak manuang mah.”

“Malano ndak ciek duo ka den pikian doh,” jawek Pasa.

“Iyo apo tu jan dimakan surang, struk beko.”

Bakatolah Yuang Pasa bahasonyo adiaknyo nan bungsu lah tamaik kuliah. Ijazah dapek, nak bujang tu babaliak pulang. Malapor bakeh mandeh jo bapak. Ka Buyuang Pasa sakalian.
Apo garan nan dilapor, wee alun dapek karajo. Lah dimasuakan lamaran kanin kamari, alun ado panggilan.

“Kok karajo surang baanye tuen Pasa,” kato Tembang.

Tembang nan anak kuliahan tu kini yo lah karajo surang. Wee batanam manggih. Lah panen sakali, dibali dek toke dari Situjuah, manggih tu diekspor ka Cino. Badagok juo Tembang dapek piti. Manih galak nak bujang tu, elok iruik rokok-e.

“Kalau ka usaho surang manga sikolah tinggi-tinggi,” kato Malano.

“Disiko salah tu makin gadang. Dalam pangana tue -tuen tamaik kuliah jadi pns kalau ndak karajo di bank jo pt semen padang. Itu se sabalik nagari pangana. Bara ka talok. Bara banalah lowongannyo. Snek2 pns snek2 semen padang. Indak bajalan kincia-kincia. Dek apo tu? Sajak sikolah lah baharok an anak bisa karajo sinan. Basanjuang-sanjuang anak, elok-elok kuliah nak kok tamaik yo jadi pns juo lah atau karajo di bank, di pt semen rancak bana, gilo mah,” kato Tembang basumangaik.

“Tapi sabana rami nak jadi pns Mbang, tu tando katuju mah,” kato Malano liak.

“Den suai jo Tembang,” kato Pakiah.

“Bia wak agiah contoh, tu nan manjua kurisi dipan sice sagalo parabot tu, sarjana teknik mah, nan di pasa, dakek simpang tu, ampiah 70 juta sabulan dapek deknyo, jadi sarjana tu untuak wawasan bukan untuak jadi pns. Nan batoko bangunan dakek terminal bitu juo. Nan labiah ebat ado namoe gojek wak kan bi tau mah. Sarjana tu. Ko nan manjua randang onlin tu, nak gadih tuh tamaik UI tu, ndak ado pangana pns tu lai doh. Kini ba usaho surang. Ado anggapan ndak ba ijazah bisa juo mah. Kok bisa manga tuen-tuen bamanuang di lapau ko sapagi kini? Jan mengecek juo lai.” Sabana tarang utak Tembang sakali ko.

“Jadi adiak den ko baa ko?”

“Tuan Pasa jan paragu. Kan lah dicuboe malamar karajo ndak dapek. Kini buek lapangan karajo lai. Tanam manggih mode den ko. Tanah lai laweh tapi indak bagarap. Indak inyo mancangkua doh. Caliak2 senyo. Bisuak den baok ka Sitijuah lu, sudah tu olah lahan lai, kayo buliah.”

“Lai ka namuah nyo ye. Manjo dek sikolah.”

“Inyo ndak manjo gai doh, keluarga nan mamanjoan, ba umbuak-umbuak juo. Tuka pangana lai. Mulai bisuak basigiro lah.”

“Bara modalnyo Tembang?”

“Indak maha gai doh. Pado abih piti dek mancari karajo ancak buek karajo, gaji urang. Baa kok muno surang-surang ko?” Kato Tembang.

Tabukak pangana Pasa. Tanah lai laweh, modal lai stek, dalam ati kalau adiaknyo ndak nio, inyo lai ka baladang manggih.

“Jadi bisuak wak pai.”

“Suka Oom, gitu dong. Tarang matoari sapagi ko mah. Teh talua den bayia li dek tuen,” kecek Tembang. (malin kapalo koto)

The post Baa Aka Lai Ko, Karajo Ndak Kunjuang Dapek appeared first on Prokabar.

“Manyangkak ati den, ompek jam tasakek di palabuhan patabang di Padang, lah litak mandehnyo dek manunggu di Medan nin,” kato Pasa.

“Kok jo oto se pai baatu?” Kato Pono.

“Telmi Mak Pono mah, dek baru tibo di lapau ko, lah masak dek kami sajak sataun lalu, oto ko banyak lo cik minyak e di jalan, alun lai sampik,” kecek Tembang.

“Nan den takuik an kok balobuak lo liak liyon ko,” kato Pono.

“Mati tak dapek dek awak doh Pono,” kato Gindo.

“Tu lah ka jalai mah, tapi kalau ndak aman di udaro pai ka lauik, ndak aman baliak ka darek, itu namor maminteh sabalum tarambau.”

“Antah kok bitu.”

“Nyo baa kok delay. Delay tu apo lo tu?” Batanyo Malin.

“Talambek tabang, tu bahaso Inggirih mah,” kato Tembang.

“Oooh tagiah namoe tu,” kecek Malin.

“Apo nan tagiah?”

” Yo bahaso Inggris tu”

“Di penerbangan tu banyak istilah bahaso Inggirih tuen, ndak samo jo angkot doh, karano patabang ko dunia wee internasional, cegaklah tuen,” kecek Malin.

“Tasarah lah, jadi baa nasib Piak Ranyah tu, Pasa?”

“Lah tangah malam baru ka pai, masin rusak. Takuik urang, sabab Liyon ko baru balabuak kapatang di lauik, wak caliak di tipi mah,” kato Pasa.

“Iyo ngeri den, ndak ado nan salamaik doh, pugaik sadoalahe.” Kato Bilang.

“Mati syahid tu mah,” kato Pakiah.

“Yo Kiah?”

“Iyo mada”

“Wakden lo bakecek an mada,” kato Pasa.

“Lah den kecek an batanyo juo lai.”

“Ha ha ha ha ha….”

Sapagi tadi lapau simpang rami liak sajak ari pa ujan ko bi jarang ka lapau. Kini lah biang langik, ma ungkok-ungkok ka lapau liak. Bagalum kain saruang. Candu maota di lapau ko nan ndak tahan. (malin kapalo koto)

The post Liyon Delai Ompek Jam appeared first on Prokabar.

“10 taun Malano,” kecek Pasa.

“Apo 10 taun?”

“Angku Imam manunggu ka pai.”

“Bajadi lamoe ye,” jawek Malano.

“Nan lakeh pai ka pasanye,” kata Yuang Pasa.

Bitulah sapagi tu di lapau simpang, agak siak jo alim urang-urang ko. Wee bi taragak ka Makkah.

“Den kalau bapiti den pai nah,” kecek Bilang.

“Ado bana piti kalau ndak dapek porsi, ndak bisa juo,” kato Tembang.

“Bisa rasoe haji plus tu ha,” kecek Pasa.

Urang di lapau ko sabana dakek jo Makkah. Sajak ngenek curito kota tu lah tapasak di kapaloe. Curito Nabi jo sahabat-sahabat. Sagalo hal nan elok-elok.

“Sangkek di surau dulu, liau bacurito ka awak lai takana? Naiak haji kalau sanggup aman di jalan indak ba utang. Dulu pai jo kapa lawuik bisa 9 bulan pulang baliak. Yo bajaso pai ka Makkah. Angku Imam awak ko lah masak deknyo kaji haji ko. Kisah-kisah Nabi di Makkah, bara kasulik managak an ugamo wak ko. Kanai kaja-kaja Liau. Di Medinah Liau tagak an musajik. Namoe Kuba. Angku Imam nan bacurito ka wak mah. Kini liau ka sinan, wak doa an se liau sehaik,” kato Pasa.

Manjalang pai ka Makkah, angku imam didoakan di musajik dek jemaah. Sudah tu tagak liau di pintu, jemaah basalam ciek-ciek.

“Den lai basalaman jo liau. Lah den pasan doa ciek ka liau bia manjadi partanian awak ka muko,” kato Pakiah.

“Jadi Pasa bilo ka pai?” Tanyo Pakiah.

“Den lah mandaftar 2 taun lalu. Pakiah kok ka lai mandaftarlah. Antah kok ati tu bana nan maleh,” kato Pasa.(Malin Kapalo Koto)

The post Angku Imam ka Makkah appeared first on Prokabar.

Kato makdang, arus baliak di Indonesia paliang lamo tu dari Padang. Sabulan labiah. Abih bensin nomor satu di Semarang nomor duo di provinsi awak ko. Sabana barayo urang di kampuang dek urang rantau bajadi banyak e nan pulang.

“Baliak makdang tu ka Jawa Pasa?”

“Tu mah iyo Bilang batanyo juo kan tampak tadi sudah subuah lah pai liau,” kecek Pasa.

“Pasa ditanyo berang, indak ditanyo berang, sagalo susah se,” kato Bilang.

“Tadi mah bi basalam jo liau, Bilang se nan indak,” kato Kuriak Batuang.

“Wakden talaik jago.”

“Manga Bilang kok talaik, piala dunia sadang perai, barek karajo malam?”

“Ha ha ha ha yo mah Batuang, kok indak ko antahlah. Bae teh talua lu gak sajamang pagi ko,” kecek Pasa.

Makdang urang tarakhir nan baliak ka rantau. Adolah gak 60 urang nan pulang tahun ko dari rantau. Pontianak, Banjarmasin, Jakarta, Banduang, Surabaya, Serang, Lampuang, Bengkulu, Jambi, Palembang, Batam, Medan, Aceh. Ado lo dari Malaysia. Banyak sangaik.
Nan Makdang ko di Jakarta menggaleh kain. Batoko wee sinan. Lah 15 tahun, jarang pulang wee nye.

“Jadi salamo makdang di kampuang, apo se ota Pasa?”

“Manga lo itu nan Bilang tanyo, ndak ado nan lain?” Semba Kuriak Batuang.

“Paja ko tagiah mah,” kato Pasa.

Sapagi tu curito tantang parantau nan lah bi pai. Taraso langang kampuang, taibo-ibo ketek ati urang. Balau pi pai mancari paruntuangan. Di rantau bakuhampeh mancari piti. Kok dapak galeh ditambah. Kok barayia asam taun muko pulang liak. Nan indak, dingin dado ari rayo tu. Urang bi pulang nan awak indak. Batageh-tagehan badan, waktu tadanga takbir, badarai juo aie mato to.

“Den pernah mangalami mah, indak bapiti ka pulang hari rayo, bapilin paruik den dek ibo ati,” cek Pasa.

Bi tamanuang majilih lapau, mangana pangalaman surang-surang. (malin kapalo koto)

The post Makdang Baliak ka Jakarta appeared first on Prokabar.

“Ang manga Tembang asa lai ka bakotek se, manggarasau ndak jalai se,” kecek Pasa

“Maleh den, lah jalai dana desa tu untuak pembangunan nan karajo harus urang nan sadang manganggur, apak-apak nan binie sakik. Apak-apak bansaik nan anaknyo sikolah, indak kamanakan pak walinagari se doh,” kecek Tembang.

“Kan biaso se tu nye Inyiak wali manyuruah nakan e karajo, sabab karajo banyak,” kecek Pasa

“Yo banyak tuen tapi nakan nyiak wali tu ma rokok-rokok se, tiok sabanta duduak, upah nak daulu, karajo sasuko ati, itu den ndak suko, “ kecek Tembang.

“Kan bisa ang kecek an elok-elok ka paja tu atau ka inyiak wali,” kato Malano lo. Nan majilih lapau diam mandanga

“Lah den kecek an tapi ndak badanga yo den ariak an lai, muak den, ko karajo basamo mah, nan iyo-iyo sae lah,”kecek Tembang

Kapatang tu yo tagak Tembang di nan tinggi nyo hariakan, “woi ko karajo untuak nagari mah indak manolong bako, untuak awak basamo, mambuek jalan ka ladang, kalau ka tagak-tagak se, ma rokok-rokok se pulang lah, den ndak takuik doh, dunsanak pejabat, dunsanak wali jorong, walinagari, pulanglah jan mentang-mentang,” kecek Tembang.
Rami urang batapuak mandukuang Tembang

“Jadilah tapi awak samo awak kan kareh bana,” kecek Malano

“Nan lain aniang sae, takuik, sagan, malehlah. Den indak, paja tu kancang ka piti,” kecek Tembang

“Suai…,” kecek Rantau
“Apo nan suai?” Pasa batanyo.
“Suai jo Tembang”
“Kalian yo ndak ado raso pareso lai,” cek Pasa

“Bialah sakali ko indak, asa urusan kampuang salasai”

Sabanahe urang satuju se jo Tembang cuma dek raso jo pareso tadi juo.

“Jadi nah. Nan ka datang jan dipabuek juo den gisa kaniang Tembang tu,” kato Pasa.

“Jadi tuen sakali ko nye asa jan diulang juo,” jawek Tembang.

“Suka oom sama Tembang,” kecek Rantau.

“Yayai nye den, yo lah, pagi ko teh talua Tembang den mambayia,” kecek Pasa.
Pagi tu urang siap-siap basugiro karajo ka proyek dana desa. (Malin Kapalo Koto)

The post Manggarasau appeared first on Prokabar.

“Nio awaklah, nan ka sikolah awak, amak jo abak ma agiah lanjo,”jawek Tembang.

“Tu lai sikolah nan disuko nan dapek?” Disambuang dek Pakiah

“Jurusan lai nan sikolah indak. Nio esem-a satu dapek esem-a anam, kan alah juo tu.”

“Amak-amak kini anak e harus masuak sikolah paporit jurusan ipa, dipasoe anaknyo kurusus sajak sanjo sampai malam, lah sakik kuniang nak bujang gadih tu,” kecek Pasa

“Kini nan sikolah amak jo abak e, anak pai ambiek absen se nye,” kato Tembang

“Galuak-galuak anak mode tu kambang jalo urang gaek e pendek, angan-angan tinggi,” kato Malano manyolang dari suduik.

Ari ko bi panik, anak tak bisa masuak ka nin tarimo siko. Ndak lulus kuliah, minta tolong suok kida. Nan lansir urang tuo sadang anak-e bakambok-kambok-an badan. Padahal utak tu bana nan ndak manalok.
Barengek-rengekan awak tapi ota tinggi dari tower.

“Tamaik esem-a nio kuliah nan ebat, tamaik kuliah mode Tembang ko ha, karajo nak di bank atau di pete simin, nilai randah, pangana main hape dah tu lalok,” kato Pasa.

“Wakdeyen ndak mode tu bana doh tuen Pasa,” jawek Tembang.

“Apo nan indak. Kok dapek datang direktur bank tu ka lapau simpang ko. Dah tu mambana-bananyo. Wahai tuen Tembang nan gagah profesional bijakbestari tiada tara, bekerjalah tuen di bank kami mulai besok, gaji 20 juta, boleh main games, jangan menolak ya Tuen, mode itu baru amuah ang karajo mah. Kalau nan ka malamar yo indak doh. Sampai batanduak kudo takkan dapek karajo ang doh,” kecek Pasa.

“Ha ha ha ha amuah den kalau mode tu,” jawek Tembang.

“Kurang mah Pasa. Jadi direktur bank tu mengecek liak: wahai tuan Tembang, batutuik bank kami kalau apak menulak. Bara gaji katuju dek apak, bara jam sahari karajo, libur suko ati apak se. Kok karajo pak main hape se indak baa doh, kami paralu bana anak mudo mode apak nan duduak-duduak mode ko, bialah kami lipek an baju apak ka rumah,” kecek pak direktur bank tu.

“Disuruah cari karajo ndak nio, suko e caliak-caliak di internet, kanai tipu marauang dalam biliak, bitu sabanahe anak kini,” kato Rantau.

“Sabanahe? Ilang aka, karajo na ka dikakok indak ado nan bisa. Pangana akhirnyo jadi cepeenes, honor jadi juo. Salek-salekan se lu. Tak bisa. Tarimolah kini karajo di konter hape dek ulah main hape se tarui. Pulang karajo bapacaran, kan bitu kan,” kato Rantau.

“Sajak sikolah lai es em es atau we a, bantuak dalam biliak urang bulan madu, cium tangan e ka amak ka abak bantuak di pintu musajik, “kato Malano

Nan Tembang lah bantuak urang ka kanai hukum cambuk di Aceh se. Manakua se, tapi lai sasakali galak. (Malin Kapalo Koto)

The post Anak Nio IPS Amak Mamaso IPA appeared first on Prokabar.