“Yo lah Kia, kok bitu lo kecek Pakiah, manyarah molah kami,” jawek Yuang Pasa.

Yuang Kuriak nan duduak di suduik sanjo kapatang, ma angguak-angguak balam.

“Bantuak balam jinak Kuriak tampak dek den,” kato Pasa.

“Biati den jo Pakiah ko, urang mahabihan pancarian salamo puaso, wee mandapek,” kecek Kuriak.

“Ha ha ha….jan sagalo ka diurus Kuriak.” Semba Malano.

“Ndak ma urus doh Malano, mengecek se ndak lo buliah?”

“Bae taruih Kuriak, den di belakang,” kato Gindo.

“Jan ma adu-adu urang se karajo baa nye,” kato kapalo arak, Yuang Pasa.

“Yuang, ancak aniang, pado den ampok jo boto paniaram ko.” Kecek Malano lo liak.

“Kok ka bacaran siko bae lah, tapi boto den jan dihampehan, babayia utang,” sabuk Tuak Bilang, sambia menyorongan laci piti.

Pakiah memang ndak bisa ka lapau mode biaso lai, sebab liau ma agiah pangajian Ramadhan dari nagari ka nagari.

Ilemu ugamo-e paguno dek umat, jadi inyo diundang untuk ma agiah pangajian Ramadhan.

“Sabulan ko mintak manas ambo ka majilih lapau, kok ado ota lamak, kaba-kabaan juo,” kato Pakiah.

Pakiah baharok ka kawan-kawannyo supayo puaso jan umpang. Taraweh jan lalai, mangaji jan tingga.

“Danga pengajian ustad, awak lah bi baun tanah surang-surang, kok payah mati bisuak, tasakek angok tu, den lah mangecek an, tugas den lah salasai,” kecek Pakiah.

Pado tamanuang majilih lapau sakutiko. Taraso kecek Pakiah cako.

“Kan awak lai lun baun tanah lai kan Mak,” tanyo Yuang Tembang.

“Waang yo muda matah baru, tapi den caliak sumbayang acok tingga, karajo ang gilo bagitar ka bagitar se, ma intai anak gadih urang, nan babini alun juo lai,” kecek Pakiah.

“Tembak 12 pas, rasoanlah,” kecek Kuriak.

Bitulah sa sanjo ka kapatang, menjalang mugarik. Indak lamo antaro e majilih lapau basugiro andak ka musajik.

Nan Pakiah cigin lakeh, sebab wee sasudah mugarik ka pai mengaji. (malin kapalo koto)

The post Pakiah Mulai Indak Ka Lapau Simpang appeared first on Prokabar.

“Dek a Yuang, buruak manuang mah.”

“Malano ndak ciek duo ka den pikian doh,” jawek Pasa.

“Iyo apo tu jan dimakan surang, struk beko.”

Bakatolah Yuang Pasa bahasonyo adiaknyo nan bungsu lah tamaik kuliah. Ijazah dapek, nak bujang tu babaliak pulang. Malapor bakeh mandeh jo bapak. Ka Buyuang Pasa sakalian.
Apo garan nan dilapor, wee alun dapek karajo. Lah dimasuakan lamaran kanin kamari, alun ado panggilan.

“Kok karajo surang baanye tuen Pasa,” kato Tembang.

Tembang nan anak kuliahan tu kini yo lah karajo surang. Wee batanam manggih. Lah panen sakali, dibali dek toke dari Situjuah, manggih tu diekspor ka Cino. Badagok juo Tembang dapek piti. Manih galak nak bujang tu, elok iruik rokok-e.

“Kalau ka usaho surang manga sikolah tinggi-tinggi,” kato Malano.

“Disiko salah tu makin gadang. Dalam pangana tue -tuen tamaik kuliah jadi pns kalau ndak karajo di bank jo pt semen padang. Itu se sabalik nagari pangana. Bara ka talok. Bara banalah lowongannyo. Snek2 pns snek2 semen padang. Indak bajalan kincia-kincia. Dek apo tu? Sajak sikolah lah baharok an anak bisa karajo sinan. Basanjuang-sanjuang anak, elok-elok kuliah nak kok tamaik yo jadi pns juo lah atau karajo di bank, di pt semen rancak bana, gilo mah,” kato Tembang basumangaik.

“Tapi sabana rami nak jadi pns Mbang, tu tando katuju mah,” kato Malano liak.

“Den suai jo Tembang,” kato Pakiah.

“Bia wak agiah contoh, tu nan manjua kurisi dipan sice sagalo parabot tu, sarjana teknik mah, nan di pasa, dakek simpang tu, ampiah 70 juta sabulan dapek deknyo, jadi sarjana tu untuak wawasan bukan untuak jadi pns. Nan batoko bangunan dakek terminal bitu juo. Nan labiah ebat ado namoe gojek wak kan bi tau mah. Sarjana tu. Ko nan manjua randang onlin tu, nak gadih tuh tamaik UI tu, ndak ado pangana pns tu lai doh. Kini ba usaho surang. Ado anggapan ndak ba ijazah bisa juo mah. Kok bisa manga tuen-tuen bamanuang di lapau ko sapagi kini? Jan mengecek juo lai.” Sabana tarang utak Tembang sakali ko.

“Jadi adiak den ko baa ko?”

“Tuan Pasa jan paragu. Kan lah dicuboe malamar karajo ndak dapek. Kini buek lapangan karajo lai. Tanam manggih mode den ko. Tanah lai laweh tapi indak bagarap. Indak inyo mancangkua doh. Caliak2 senyo. Bisuak den baok ka Sitijuah lu, sudah tu olah lahan lai, kayo buliah.”

“Lai ka namuah nyo ye. Manjo dek sikolah.”

“Inyo ndak manjo gai doh, keluarga nan mamanjoan, ba umbuak-umbuak juo. Tuka pangana lai. Mulai bisuak basigiro lah.”

“Bara modalnyo Tembang?”

“Indak maha gai doh. Pado abih piti dek mancari karajo ancak buek karajo, gaji urang. Baa kok muno surang-surang ko?” Kato Tembang.

Tabukak pangana Pasa. Tanah lai laweh, modal lai stek, dalam ati kalau adiaknyo ndak nio, inyo lai ka baladang manggih.

“Jadi bisuak wak pai.”

“Suka Oom, gitu dong. Tarang matoari sapagi ko mah. Teh talua den bayia li dek tuen,” kecek Tembang. (malin kapalo koto)

The post Baa Aka Lai Ko, Karajo Ndak Kunjuang Dapek appeared first on Prokabar.

“Manyangkak ati den, ompek jam tasakek di palabuhan patabang di Padang, lah litak mandehnyo dek manunggu di Medan nin,” kato Pasa.

“Kok jo oto se pai baatu?” Kato Pono.

“Telmi Mak Pono mah, dek baru tibo di lapau ko, lah masak dek kami sajak sataun lalu, oto ko banyak lo cik minyak e di jalan, alun lai sampik,” kecek Tembang.

“Nan den takuik an kok balobuak lo liak liyon ko,” kato Pono.

“Mati tak dapek dek awak doh Pono,” kato Gindo.

“Tu lah ka jalai mah, tapi kalau ndak aman di udaro pai ka lauik, ndak aman baliak ka darek, itu namor maminteh sabalum tarambau.”

“Antah kok bitu.”

“Nyo baa kok delay. Delay tu apo lo tu?” Batanyo Malin.

“Talambek tabang, tu bahaso Inggirih mah,” kato Tembang.

“Oooh tagiah namoe tu,” kecek Malin.

“Apo nan tagiah?”

” Yo bahaso Inggris tu”

“Di penerbangan tu banyak istilah bahaso Inggirih tuen, ndak samo jo angkot doh, karano patabang ko dunia wee internasional, cegaklah tuen,” kecek Malin.

“Tasarah lah, jadi baa nasib Piak Ranyah tu, Pasa?”

“Lah tangah malam baru ka pai, masin rusak. Takuik urang, sabab Liyon ko baru balabuak kapatang di lauik, wak caliak di tipi mah,” kato Pasa.

“Iyo ngeri den, ndak ado nan salamaik doh, pugaik sadoalahe.” Kato Bilang.

“Mati syahid tu mah,” kato Pakiah.

“Yo Kiah?”

“Iyo mada”

“Wakden lo bakecek an mada,” kato Pasa.

“Lah den kecek an batanyo juo lai.”

“Ha ha ha ha ha….”

Sapagi tadi lapau simpang rami liak sajak ari pa ujan ko bi jarang ka lapau. Kini lah biang langik, ma ungkok-ungkok ka lapau liak. Bagalum kain saruang. Candu maota di lapau ko nan ndak tahan. (malin kapalo koto)

The post Liyon Delai Ompek Jam appeared first on Prokabar.

“10 taun Malano,” kecek Pasa.

“Apo 10 taun?”

“Angku Imam manunggu ka pai.”

“Bajadi lamoe ye,” jawek Malano.

“Nan lakeh pai ka pasanye,” kata Yuang Pasa.

Bitulah sapagi tu di lapau simpang, agak siak jo alim urang-urang ko. Wee bi taragak ka Makkah.

“Den kalau bapiti den pai nah,” kecek Bilang.

“Ado bana piti kalau ndak dapek porsi, ndak bisa juo,” kato Tembang.

“Bisa rasoe haji plus tu ha,” kecek Pasa.

Urang di lapau ko sabana dakek jo Makkah. Sajak ngenek curito kota tu lah tapasak di kapaloe. Curito Nabi jo sahabat-sahabat. Sagalo hal nan elok-elok.

“Sangkek di surau dulu, liau bacurito ka awak lai takana? Naiak haji kalau sanggup aman di jalan indak ba utang. Dulu pai jo kapa lawuik bisa 9 bulan pulang baliak. Yo bajaso pai ka Makkah. Angku Imam awak ko lah masak deknyo kaji haji ko. Kisah-kisah Nabi di Makkah, bara kasulik managak an ugamo wak ko. Kanai kaja-kaja Liau. Di Medinah Liau tagak an musajik. Namoe Kuba. Angku Imam nan bacurito ka wak mah. Kini liau ka sinan, wak doa an se liau sehaik,” kato Pasa.

Manjalang pai ka Makkah, angku imam didoakan di musajik dek jemaah. Sudah tu tagak liau di pintu, jemaah basalam ciek-ciek.

“Den lai basalaman jo liau. Lah den pasan doa ciek ka liau bia manjadi partanian awak ka muko,” kato Pakiah.

“Jadi Pasa bilo ka pai?” Tanyo Pakiah.

“Den lah mandaftar 2 taun lalu. Pakiah kok ka lai mandaftarlah. Antah kok ati tu bana nan maleh,” kato Pasa.(Malin Kapalo Koto)

The post Angku Imam ka Makkah appeared first on Prokabar.

Kato makdang, arus baliak di Indonesia paliang lamo tu dari Padang. Sabulan labiah. Abih bensin nomor satu di Semarang nomor duo di provinsi awak ko. Sabana barayo urang di kampuang dek urang rantau bajadi banyak e nan pulang.

“Baliak makdang tu ka Jawa Pasa?”

“Tu mah iyo Bilang batanyo juo kan tampak tadi sudah subuah lah pai liau,” kecek Pasa.

“Pasa ditanyo berang, indak ditanyo berang, sagalo susah se,” kato Bilang.

“Tadi mah bi basalam jo liau, Bilang se nan indak,” kato Kuriak Batuang.

“Wakden talaik jago.”

“Manga Bilang kok talaik, piala dunia sadang perai, barek karajo malam?”

“Ha ha ha ha yo mah Batuang, kok indak ko antahlah. Bae teh talua lu gak sajamang pagi ko,” kecek Pasa.

Makdang urang tarakhir nan baliak ka rantau. Adolah gak 60 urang nan pulang tahun ko dari rantau. Pontianak, Banjarmasin, Jakarta, Banduang, Surabaya, Serang, Lampuang, Bengkulu, Jambi, Palembang, Batam, Medan, Aceh. Ado lo dari Malaysia. Banyak sangaik.
Nan Makdang ko di Jakarta menggaleh kain. Batoko wee sinan. Lah 15 tahun, jarang pulang wee nye.

“Jadi salamo makdang di kampuang, apo se ota Pasa?”

“Manga lo itu nan Bilang tanyo, ndak ado nan lain?” Semba Kuriak Batuang.

“Paja ko tagiah mah,” kato Pasa.

Sapagi tu curito tantang parantau nan lah bi pai. Taraso langang kampuang, taibo-ibo ketek ati urang. Balau pi pai mancari paruntuangan. Di rantau bakuhampeh mancari piti. Kok dapak galeh ditambah. Kok barayia asam taun muko pulang liak. Nan indak, dingin dado ari rayo tu. Urang bi pulang nan awak indak. Batageh-tagehan badan, waktu tadanga takbir, badarai juo aie mato to.

“Den pernah mangalami mah, indak bapiti ka pulang hari rayo, bapilin paruik den dek ibo ati,” cek Pasa.

Bi tamanuang majilih lapau, mangana pangalaman surang-surang. (malin kapalo koto)

The post Makdang Baliak ka Jakarta appeared first on Prokabar.

Yuang Pasa jo Tuak Bilang babenta di pasa saharian. Panek wee duduak ngopi. Nyo caliak urang di pasa tu, tampek urang manjua baju anak sikolah, sabana rami. Padek bana. Induak-induak jo lakie ado anak e gai. Mamiliah-miliah baju. Dek urang ka sikolah lai mah.

Dah tu kadai sipatu sikolah. Ondeh mak, takah tu pulo. Nan obral ado lo di kaki limo, lah bantuak kapa pacah. Cam tu lo kadai tas jo buku, sagalo ado. Rami alang kapalang.

“Tu Pasa pai jo Bilang ka pasa untuak caliak-caliak sae?” Batanyo Malano
“Cuci mato,” kato Pasa.

“Mantiak kudian se Pasa mah,” kecek Wan Tengka.

“Pakia ka kida se pangana mah. Cuci mato tu kan mancaliak nan rancak-rancak,” jawek Pasa.

“Oh itu baru tau den kalau bitu. Induak-induak nan manih-manih ndak Pasa liek doh?” Kato Tengka.

“Kalau tu bilalang tasemba sambia manuai mah,” jawek Pasa takekeh.

“Makoe tadi den kantoan mantiak.”

“Kami ka pasa sahari kapatang yo pai raun-raun, cuci mato, makan siang, ngopi, baa bisuak pai Tengka ndak?

“Tu amuah tu, suai, jam 11 lah,” kato Tengka.

Sabanahe Tengka ka mambali sipatu anak e sabab kapatang tu rami bana. Kalau barisuak alah gak langang dan harago bisa turun snek.
Kapatang Tengka lah pai tapi maliek oto pribadi bajado banyak e pasa panuah bantuak pengungsi tigo negara, wee baliak kanan sae lai.

“Tapi kalau wak pai bisuak, makan siang Tengka mambayia lah,” kato Pasa.

“Tu kaji manurun nah, ongkoi gai wakden mambayia,” katoe.

“Kalau bitu mulailah kini, minum pagi ko bayia lu,” jawek Bilang.

The post Ka Pasa, Sasak Sadoalahe appeared first on Prokabar.

“Pansan den banyak bana baralek kini,” kecek Pasa.

“Manga Pasa pansan, kanai undang indak, dari kapatang duduak se di lapau nye,” kato Bilang.

“Ee ndak ye, ma agak-agak-i deyen.”

“Apo nan Pasa pikia, ka baralek lo Pasa liak?” Panciang Pakiah.

“Amuah tu, sato wak ma anta,” kato Tembang.

“Woi Tembang, anyuik lah ko, ang den suruah babini karajo mamadek-madek labuah se,” kato Pasa.

Pasa batua, yo sabana banyak urang baralek sajak rayo. Gubernur gai baralek lo, redaktur prokabar.com si Ari nan subur tu ha.

“Baralah uang babaju rancak banyak e tu ndak,” kato Bilang.

“Manga baju urang nan bilang kana?” Kato Pasa.

“Ciinan lo den babaju batik co apak-apak tu,” kecek Bilang.

“Balilah, piti lai tapi sampilik, ka babaok mati piti tu,” jawek Pasa.

“Maha”

“Nan murah singket cap swan nye,” kecek Tembang lo sambia menyamba rokok Pasa. Sudah tu nyo bae goreang pisang lai.

“Urang salapau ko dulu baa baralek, lai mode kini?” Tembang batanyo

“Woi jan disabuik lai Tembang, sabana rami alek Pasa, siang malam,” kato Malano nan jak tadi mandanga se.

“Alek gubernur baa?” Tuan Baralah batanyo.

“Ma tau den, tak kanai udang,” kecek Pasa.

“Basalahan bana tu, tuen Pasa ndak kanai udang kapalo arak lapau simpang ta icia,” kato Tembang.

“Ang jan den lo dihambok lai Tembang, den gergaji kuduak tu beko,” kato Pasa.

“Jan basisalak juo di lapau den ko, awak sia, kok ka kanai undang gai dek pak Gubernur,” kato Baralah.

“Yo itu nye deyen mah, awak sia, beko malam se pai mandanga saluang lai ka rumah nakan Pakiah,” kecek Malano.

Sapakaik majilih lapau beko mandanga saluang ka rumah nakan Pakiah. (malin kapalo koto)

The post Baralek Sabalik Nagari appeared first on Prokabar.

“Duduak elok-elok lu Lin, baru batanyo,” kato Tan Tuah

“Ndak tahan den lai, demokrasi apo pulo ko namoe, disarahan nagari ka nan cadiak, yo bama nyo lego,” kato Malin.

“Nyo bitu mah Lin, di nagari demokrasi ko kan suaro nan manantuan,” kecek Tuah.

“Kalau itu lai jalai dek den nye,” cek Malin.

“Man indak jalai apo dek tuen Malin?” Tembang manyolang.

“Baa kok bisa kotak kosong nan manang?”

“Dek nan lawan-e nan urang tu, indak katuju dek rakyaik,” kato Tuah.

Di Makassar nin urang mamiliah walikota. Calon tunggal. Dek surang se ba adu jo kotak suaro kosong. Ndak tahunyo kotak kosong tu nan manang.

“Dek a tuw kok kotak kosong manang. Itu nan den heranan mah.”

“Sato den lai. Mangkoe kotak kosong manang dek rakyaik lah muak. Wee maju mangapil kapalo harimau. Mantang-mantang nakan wapres kaba-e. Kacak batih lah bak batih, kacak langan lah bak langan, nan urang ka nyo bali sadoe. Muak rakyaik tak nyo piliah. Kotak kosong nan dipiliah rakyaik. Lai tau raso. Idok an lah,” kecek Pasa

“Oh mantun. Kayo selah den tak ka mamintak, cadiak se lah den tak ka batanyo, pilkada se lah den takkan mamiliah ha ha ha yo sero lo ye,” kato Malano.

“Malano lah tau tapi batanyo juo,” kecek Tan Tuah.

“Panasaran den, adolo gai ha ha yo sero ndak. Siko gak sakali tajadi lo mah, liek lah,” kato Malano.

Urang lapau simpang ko walau randah sikolahe tapi soal musyawarah, mamiliah, demokrasi, tau bana. Kalau lah ndak lamak ati lai mako alamaik ka kalah mah.

“Asa badatak ati kalah mah. Ati rakyaik ko kosong jo pulitik mah. Makoe kato nan cadiak-cadiak, suaro rakyaik suaro Tuhan,” kato Tembang lo.

Anggota lapau tu lah bocan pilkada ka pilkada se hasil e koruptor baru.

“Den lah bocan mah,” kato Tuah

“Ha ha lah banyak rakyaik nan bosan tapi kan awak ba demokrasi, harus sato,” kecek Tembang.

“Yo den sato tapi kalau ado kotak kosong den cucuak saratui kali bia telak manang e,” kecek Pasa lo.

“Kotak kosong kalau manang samo ko kaliki jantan babuah mah,” kato Pasa.

“Salamo ko labek dek bungo se nan sakali ko babuah. Batua-batua ha ha,” kato Tuah.

Lapau simpang sapagi tu mambahas kotak kosong. Alun surang juo nan lah pai ka Makassar ha ha. (malin kapalo koto)

The post Kotak Kosong Manang, Bak Kaliki Jantan Babuah appeared first on Prokabar.

“Quran se dikorupsi urang kini Pasa, jan heran lain,” baleh Tan Tuah.
Tan Tuah ko anggota majilih lapau simpang juo tapi wee lah tigo bulan ka Jambi. Sabalum puaso wee pai. Baru pulang kini. Wee ka nin ka rumah adiaknyo.

“Tan Tuah lah tinggi ilemu e kini mah Pasa, jan gara-gara lo lai,” kato Wan Tengka.

“Aden cameh nagari ko, rapun dek korupsi. Caliak Malaysia, sangonyik se nye, badaram. Perdana menteri ditangkok,” kato Pasa.

“A nan kurang lai? Mangaji santiang, wakatu sumbayang tak baputiak, alun azan urang lai nyo lah sudah bauduak. Moral ebat, sagalo ado, tapi korupsi juo, heran den a nan tajadi di nagari ko,” kata Malano.

“Nan tajadi, rakuih, indak sadang-sadang,” kato Pakiah.

“Sabanahe tak ti den, sistem di nagari awak ko nan lamah. Di nagari urang baa kok bisa urang takuik korupsi?” Kato Kuriak Batuang.

“Bapalapeh se tantu iyo,” kato Tembang.

“Mental kanai, ilemu ugamo tipih, kesempatan ado, awak mamacik, karajo mancilok se. Sanang ati den nyo tangkok dek kapeka ko. Bahondoh masuak pinjaro.” Pasa lah bantuak anak baru tamaik kuliah. Santiang.

“Caliak dek Pasa nopanto ketua depe-er sari tu, ratusan miliar atai triliun yo dihampai e piti katepe. Sampai kini den ndak bakatepe doh, baa indak ka rusak nagari awak ko,” kecek Rantau.

“Jadi ingekan lah ka Tembang kok jadi pejabat isuak, usah baniek korupsi, haram. Lai jalai dek Tembang tu,” kato Bilang.

“Doanlah dek dapek karajo tek tuen. Sudah tu den karajo elok-elok indak korupsi,” kecek Tembang.

“Santiang. Mode tu kalau mulai karajo tapi kalau lah mamacik, mulai mah,” kecek Pakiah.

“Lieklah kalau anak minantu dapek karajo tampek basah, sanang bana ati. Itu artie sanang makan piti haram namun ka musajik rajin juo,” ditambah dek Rantau.

Bitulah majilih lapau simpang gata-gata kapaloe mancaliak urang korupsi. Berang wee tapi apo nan kadisabuik. Marutok-rutok se nan bisa. (Malin Kapalo Koto)

The post Lah Kanai Cokok dek Kapeka, Indak Juo Jaran appeared first on Prokabar.

Pagi tu, lah bi muak urang di lapau ko, jambatan rusak, jalan balubang lah labiah satahun, indak juo bapelok. Nan jalan kabupatenlah, jalan provinsilah, jalan negara. Macam-macam se namoa. Nan tajadi, ma angkuik hasil bumi ka pasa susah bana.

“Soal jambatan jo labuah nan rusak tu, pamarintah wak ko sabana cadiak atau indak ado pangana ka mamelok sangenek juo. Lameh den mencaliak,”kecek Bilang nan tiok ari ka pasa manggaleh.

“Itu namoe, cadiak malam, binguang siang, gilo ma ukua kayu tagak, masak malam matah siang,” kato Pasa.

“A tu tidak ngarati den doh, lai indak Pasa sabuik-sabuik se tu?” Batanyo Rantau nan jak tadi aniang sen.

“Kue bolu babungkui jo sarbeta,” kecek Pasa sumbarang jawek.

“Ha ha ha ha salah, nan bana, patai digoreang pakai lado ijau, dibungkui jo sarbeta, dilatak an di tumbala,” kecek Kuriak Batuang.

“Nan den kecek an tu, gaya pemerintah tu mah, den uraian ciek-ciek bia batabah ilemu tu, walau utak lah bi boku, bantuak minyak manih di boto di dapua urang Alahan Panjang. Lah lalok minyak tu, ba angek an lu, mode itu utak tuan-tuan surang-surang mah,” kecek Pasa.

“Pasa bantuak jupen bana taraso dek den lah,” kato Malano.

“Koatilah, nan jalai cadiak malam, binguang siang, gilo ma ukua kayu tagak itu mukasuiknyo panjang angan-angan tapi indak ciek juo nan jadi, rencana se nan ado, pamaleh. Pejabat-pejabat wak ko banyak lo nan pamaleh mah. Gilo ma ukua kayu tagak se, a gunoe diukua? A gunoe jalan ko diukua-ukua-ukua tiok sabanta, bakeker bagai, bapiciangan mato sabalah, lameh den. Jalan ko lah rusak duo tahun lamoe. Katoe taun muko dikarajoan, ko kini taun muko tu mah, indak juo doh. Ba ukua juo lai. Piti tidak ado? Kapunduang bahabuih ndak ado. Ntuk raun-raun ka Jawa tarui se ado, yo lah muak den,” kecek Pasa.

“Pasa berang dek jalan jo jambatan rusak atau dek harago lado jatuah?” batanyo Bilang

“Ha ha ha den dek sayang jo nagari ko senye,” jawek Pasa.

“Lah patuik Pasa jadi tokoh masyarakat mah,” kato Kuriak Batuang.

“Jadi datuak nan pas,” kecek Tembang.

“Tapi sabanta lai dilewakan, ang Tembang, ta icia tarui, banyak tidak tahu,” kato Rantau.

“Wak mampajaleh, bia jalai, tegas dan bia awak jan lupo,” kecek Tembang

“Oh mantun, tu babantaian kabau Mbang?
“Bato pulo!”

“Jadi sia-sia se nan ma ukua kayu tagak tu Pasa?” Tanyo Malano.

“A mukasuik kok ba ulang-ulang batanyo? Ka barekam? Tu bakaduan den ka polisi, menghina pajabaik negara, bitu?” Kato Pasa.

“Lah panakuik kini se Pasa mah?” Kato Kuriak Batuang.

“Ko tidak soal panakuik tapi manyangkuik sifaik kawan menusuak dalam salimuik mah,” kati Pasa.

“Jadi Malano mode itu?” Kato Kuriak.

“Ha ha ha ha lah ba adu kami mah Kuriak, lah mode ayam kami babuek,” kecek Pasa.

“Kan dalam pulitik memang mode tu,” kato Kuriak.

“Ndeh lah kamari pai se, beko lewat wakiah rakyaik awak lo nan kanai,” jawek Malano.

“Sagalo indak ka buliah, sumbek se lah muncuang surang-surang lai, plaster. Ko demokrasi kini mah, zaman buliah mengecek, asa indak suumbarang se. Kalau aasa malontong, embe pacah, kanai pasal, kalau kanai pasal, ba urusan jo aparat,den tidak sato,” kecek Pasa.

“Sata tidak sata angkat tuen Pasa,” kecek Tembang.

“Yo angkek galeh kopi den ko rang lapau, tambah aie angkek, agiah kopi snek, “ kato Pasa.

Curito sapagi tu salasai, kutik Piak Manih datang ma imbau.

“Uda, ka rumah lai, tapi awak ka pai bali tipi,” kato Piak Manih.

“Dek lai mah, pailah Pasa, non tunai kini mah, ha ha ha ha,” kecek Bilang.

Majilih lapau manutuk sidang di lapau simpang jo galak gadang. (malin kapalo koto)

The post Cadiak Malam, Binguang Siang, Gilo Maukua Kayu Tagak appeared first on Prokabar.

“Dek apo Pasa, bantuak upeh se, berang-berang?” Tanyo Wan Tengka

“Baa ka indak dek Tengka, kapatang tu den ka Bangkinang, di Kelok Sambilan sarok kalau diungguak satinggi rumah gadang tigo ruang,” kato Pasa

“Sarok a tu?” Batanyo Bilang nan duduak sabalah Pasa.

“Sarok kulek-kulek, palastik, boto aie, sagala bantuak, nan dibaok urang tu bacampakkan se sinan sasudah mengulek-ngulek baminyak bibie, nyo indak irau jo sarok lai,” kecek Pasa.

“Oooh itu, mode anjiang ka tabek mah Pasa, payah malarangnyo,” kato Bilang.

“Co kuciang gaek calia, gilo ka songkok di ateh meja se taruih,” sabuik Tengka.

“Itu nan talingo kuali tu?” Jawek Rantau lo

“Yo mada, heran den, padohal ugamo lai mah, tiok cacah mangaji, kebersihan sebagian dari iman, sikolah tinggi lo gai, dek atu urang awak ko yo?” Kato Pasa

“Tuen Pasa danga den elok-elok, wakden sikolah ko mah, tagisia den,” kato Tembang

“Indak Tembang nan bijak gagah penyanyi hebat ko nan den sabuik doh, tipih bana talingo Tembang mah,” kato Pasa.

“Danga den lu tuen, urang nan mambuang sarok tu samo jo sasak kajamban mah, dima ka lapeh sen. Partamo sarok ko dek nyo harus dibuang, harus barasia dakek inyo se. Di ruang tamunyo di laman, ateh oto, salabiahnyo indak nyo pikian. Jadi manuruil profesor nan ma aja den sari, untuak baranti mancampakan sarok sumbarang se harus tegas. Tagak disiplin tu. Dulu wak maludah sumbarang se, malacik salemo sumbarang se, buang aie di parak sudah tu di tabek, kini tu mah lah ba wese duduak bagai. Nyo mode di Padang sari tu ha, sangkek walikota Pak Sarul tu, dima liau kini?” Kato Tembang panjang wee ngecek

“Naaahhh wak japuik liak Pak Sarul mamelok soal sarok ko baa. Tugas liau ma atur sagalo kabarasian di Minangkabau ko,” kecek Malano

“Ha ha ha ncak lo mah, mambana wak ka liau, Pak tolong kami dek apak, sabab indak surang alah juo nan segeh doh ma urus sarok,” kato Tengka

“Memang pamarintah ko wajib tegas mah indak rapek ka rapek sen doh. Sudah tu balian tampek sarok nan gadang, mode di lua nagari tu ha di tipi den caliak,” kato Bilang.

“Awak disiplin, pamerintah alah tegas, tampek sarok alah ado, sudah tu kama dibuang? Lai ado? Den caliak tampek mambuang sarok ko, lah bataun sarok sinan, indak ba ungkik-ungkik. Jadi mode roda oto mah harus barangin sadoalahe kalau indak mah amuah jalan,” sabuik Malano.

“Tinggi bana kaji rang lapau ko, sok tau lai lo. Nan sabanahe sadang tajadi, nagari awak ko indak ado nan ma urus soal-soal ngenek mode ko. Ado bana urang e kurang. Banyak urang, piti tak cukuik. Cukuik piti, sagalo langkok, awak nan rakyaik ko memang dasarnyo kumuah. Harus diaja, awak ko melayu kopi daun ko mah, sagalo santiang tapi mengecek se, baa gak ati, lai tagok kecek den?” Pasa lo lai sok tau.

“Tagok, santiang, bia lah den pai cah manyapuik Pak Sarul Ujud tu dima liau tingga?” Kato Tembang.

“Di Jakarta, japuiklah?” Kato Pasa.(Malin Kapalo Koto)

The post Ugamo Lai, Sikolah Tinggi, Nan Sarok Baserak-serak appeared first on Prokabar.

“Sanang bana ati Baralah, lah bacucu liau. Gilo manjujai se. Nan den takuikan tajuai bini urang, babayia utang,” kato Pasa.

“Nan candu manjujai bini urang tu yo Pasa. Asa lai ka pasa, itu mah karajoe,” kato Rantau sambia mencubo kopi paik nan baru tahidang.

Majilih lapau nan lain mode tu lon batuangan kopi angek ko ka tadah. Bakulek juo pisang rajo goreang nan sagadang pangka langan tu.

“Bantuak inyo se nan bacucu,” kato Malano.

“Jan jujai ka jujai se, kekahan lai,” kato Pakiah.

“Kambiang bia den tolong balian ka pasa,” kato Bilang.

“Ha ha asa pitih masuak, Bilang pasti nomor satu,” jawek Pasa.

“Namoe se Bilang, gilo mambilang-bilang pitih se,” tambah Malano.

Nan Tuan Baralah galak-galak se. Bantuak kadikacaknyo dunia.

” Kalau saran den, minum pagi di lapau ko, perai se lai,” kato Pasa.

“Asa ka perai, nan Pasa nomor satu,” kato Bilang.

“Nan kancang pitih masuak kan tetap Bilang,” kato Malano.

“Nan jujai baa?” Batanyo Tembang.

“Tembang ancak aniang. Babini lah lu, jauah lai,” kecek Baralah.

“Tapi paralu mah dek Tembang, jan dipatahan lu. Manjujai anak, manjujai cucu jo manjujai bini urang atau nak gadih urang balain mah. Jadi Tembang ko paralu baraja manjujai mah,” kato Pasa.

“Nan Pasa bara kali sahari manjujai Piak Manih?” Batanyo rantau.

“Tu urusan den,” kato Pasa.

“Pasa ko mantiak mah, jan salah-salah lai,” sabuik Malano

” Nan mantiak tu padusi, ndak jantan doh. Mantiak, jongkek, samo tu nye,” kecek Pasa.

“Jujai dulu pernah dilombakan dek pekaka mah,” kato Rantau.

“Tu sia manang?”

“Bini gubernur ha ha ha. Ndak tau den. Tanyo ka panitia e,” jawek Rantau.

” Alah tu jujai ka jujai se. Nan minum pagi ko lai jadi jadi perai?” Kato Pasa.

Bitulah sapagi tu di lapau simpang, sagalo ka nyo kucikakan dek majilih lapau tu. (malin kapalo koto)

The post Gilo Manjujai Sae, Tajujuai Bini Urang appeared first on Prokabar.

” Tu namoe talingo kuali mah Tengka,” Bilang bakato

“Ndak talingo kancah?” Batanyo Pasa

“Kalau kancah, arang atau muncuang sen nan gadang,” kato Bilang pulo

“Oh mantun ye,” semba Tengka.

“Mangko den kecek an indak mandanga, kawan den ko kareh bana atie nak jadi anggota dewan. Piti sayuik, kawan kurang, di partai indak lo mamacik. Banyak nan ebat dari inyo. Pambuek baliho gak ciek se ndak doh pitie doh,” kato Tengka.

“Dek itu Tengka kecek an kawan tu talingo kuali?”

“Yo”

“Kalau Tengka manuruik den, gadang arang samo ko kancah,” kecek Pasa

“Bato baa kok denai lo nan kanai?”

“Kalau urang Tengka kecek an mode tu, kini Tengka den tuduah gadang arang, baa?” Kecek Pasa

“Podo tuen, draw main samo-samo gol. Anam surang?” Kecek Tembang pulo

“Anam? Balak anam mah, tasapik,” nyo semba dek Bilang

“Kalau awak mampakecek an urang, awak dipakecek an urang lo,” kato Pasa liak

“Aden indak mampakecek-an doh. Aden ma agiah analisa jo nasihat, ma tau di lapau lo ado lo nan ka maju, etong bana langkah tu lu, beko ka Indaruang belok kiri, den ndak ka ma anta doh,” kecek Tengka.

“Pasa ka maju mah, sudah panen ado bulan muko,” kecek Bilang.

“Yo ncak mah, untuak ka syaraik kampuang wak, harus ado gak surang nan jadi caleg,” kecek Tengka

“Den sokong,” kato Bilang

“Bia wak manyanyi wakatu kampanye,” Tembang ma usulkan dirinyo.

“Apo lague tu?” Bilang mamanciang liak.

“Tuen Pasa jadi caleg, dibuek lu.”

“Ndak jadi anggota dewan den?” Pasa batanyo

“Tagantuang analisa tuen Tengka tu nye?” Jawek Tembang.

“Majulah kan lah tapanuhi syaraik mah, manang kalah soal lain lo tu.”

“Jalai-jalailah Tembang,” kato Bilang.

“Ndak tapiliah mahabian piti sen, jan lai,” kato Tengka

“Cek kalian engak bana den, ancak den bali lanau gak tigo ikua, baranak-e, jadi caleg? Ampun den tak ka sato?” Jawek Pasa.

Nan majelis lapau simpang tasenggeng sen. Mode tulah analisa pulitik apak-apak tu. Lai suai? (Malin Kapalo Koto)

The post Talingo Kuali, Gadang se Nan Lai appeared first on Prokabar.

“Pasa den ingek an liak yo, pepatah tu jan dituka-tuka juo. Aslinyo anyuik labu, dek Pasa batuka jo embe,” kato Malano.

“Pepatah tu harus menyasuaikan diri lo mah Lano, ma ado urang kini ma abiak ayia jo labu. Jo embe kini lai, tu lah jarang lo mah, sabab ayia lah naik ka rumah dek pamsimas,” kato Pasa.

“Itu tando pepatah ko dibuek nenek moyang wak, sangkek tu lun ado embe lai, kalau ka mamakai embe dalam pantun atau pepatah, buek lo surang, jan main tuka-tuka se,”kata Malano.

“Antah iyo Pasa ko, asa ka manuka sae,”kecek Bilang.

“Jan sato lo Bilang, biriak-biriak tabang ka samak, tibo di samak makan padi, lai jalai dek Bilang tu?”
“Kerambil setandan lebat lai jalai lo dek Pasa?”

“Jan bakucikak juo, jadi baa nan sato-sato tu?” tanyo Pasa liak.

“Nyo biko curito nan dengan tuen Pasa, sasudah pilkada patang tu, nan manangkan lah jalai, nah dek inyo maraso jadi pandukuang, lah raso ka nyo kacak se nagari ko. Ondong ayia ondong dadak, kama ayie, inyo lah pai lo ka sinan. Akibaik e, abih pitinyo, karajo tak tatakok. Lah labiah 15 ari paja tu basikencak se. Bantuk labu diabuih ciek, baroyak deknyo pariuak tu,”kecek Tembang.

“Tu baa lai,” Pasa ingin basicapek se.

“Limo baleh ari ilia mudiak, sorak-sorak se, main ikan main garundang, ikan main jo sisiak banyak, garundang main jo paruik buncik. Tak lamo antaro-e lah kuruih dompet ko, abis piti, diminta dana ka ketua tim sukses, kanai tolak, diminta ka wakil-e tak tantu jawab. Madok bana ka calon lai, nyo iyo-iyoan se. Nyo tanam tabu di bibia, ari abih, pitih abih, kini lah bantuak kain buruak disasah, ibo den,” kato Malintang.

“Kini lah inyo lo maraso manang, maraso bajaso, tiok sabanta lo pai liak, kerek den,”kecek Bilang.

“Itu nan kecek an tadi, anyuik embe dek manyauak, ilang kabau dek kubalo tu,” kato Pasa.

“Urang nan rami ma uyua-uyuan kudo bapacu tu, ado nan nyo mukasuik tu. Caliaklah ka galangang. Kalau dalam pulitik, indak ado nan perai doh. Ma intai jabatan mah, jalai lah den lai,”kato Rantau.

“Woi Rantau dima lo jalai dek angku, pagawai indak, tim sukses indak, tokoh pulitik indak, karajo memelokkan banda ka sawah mintuo sen,” kato Pasa.

“Ha ha ha tu apolo beda-e jo Pasa, samo se sayak jo tampuruang tu nye,”kato Malano.

“Suaaaiiii,”kato Rantau.

“Nan manuruik den, bedo lo si kencang dayang-dayang dari anak daro, yu bakalabihan mah, ingekanlah pasa tu, beko dicibian urang, baru tahu,” kato Pasa.

“Nyo santiang pado awak mah tuen Pasa, masa deknyo tujuah muluk tu, bintang salapan, tangka kondiak, tangka jariangau, tangka mancik, jo palangka-an we-e bajalan mah, caro rang kini jo survei,”kato Tembang.

“Tu mah dek santiang e, nyo tunggu durian rareh, harimau sansai se di bawah batang durian tu mah, nyo panjek tang durian? Lah langke. Urang lah bakucatak, jauh sabalum durian babuah, wee manunggu durian rareh, indak engek tu,”kecek Pasa.

“Jadi baa andak-e dek Pasa?”

“Mandian lah nyo ka lubuak kelok tigo tu ha, siram jo ayia daun rasam, kajuik-an, sudah tu ambui ubun-ubun-e,”kato Pasa.

“Bagunjiang se, bi masuak narakolah surang-surang baa nye,”kato Tuan Baralah. Galak badarai urang salapau sapagi tu. (Malin Kapalo Koto)

The post Sasudah Pilkada, Anyuik Embe dek Manyauak, Ilang Kabau dek Kubalo appeared first on Prokabar.

“Ndak nyangko den Korea ko ka manang, bisa kalah deknyo Jerman,” katoPasa.

“Nyo Korea ko dak ma ko?Dakek Iran?” Batanyo Kuriak Batuang.

“Dakek Australia mak,” jawek Tembang
“Indak dakek India? Kan arah-arah ka ilia tu wilayahe mah,”kato Bilang.

“Oi lai bi sikolah dulu? Kok lai, nilai geografi pasti merah mah. Korea tu kan dakek Japang, Chino, tulisan e se samo, bantuak e sarupo, yo lah bi engak surang-surang mah,” kato Malano.

Jadi manuruik analisa rang lapau makoe Jerman bisa kalah dek sajak awal wee lah takuikka kalah. Urang tibo jo baban di kapalo, Jerman datang jo baban di kapalo, di kuduak, di bau, jadi manggau wee jo dirinyo surang,” kecek Pasa.

“Sok ebat lo Pasa mah, Jerman kalah, titik, jan banyak analisa lolai,wak tukang lado,” kecek Rantau.

“Indak sok ebat tu doh, analisa sabana tajam mah, samo jo sembilu,” kato Pasa.

“Sudahlah, kok ka manang Korea kok ka kalah Jerman, nan jalai Brazil juara dunia, itu kalau dek den,” kato Wan Tengka.

“Yo Tengka kan bantuak urang Brazil mah, dulu sangkek sikolah ebat main mode Pele sadang damam tujuah ari mpak dek den,” kato Pasa.

“Indak bitu doh, pilkada baa? ancak itu ota lai,” kato Rantau menyolang.

“Pilkada jagoan Pasa kalah,” jawek Bilang.

“Jagoan den sia manang,indak sia kalah doh,” jawek Pasa.

“Samo wak,” kecek Malano

“Pilkada ko jan dipikia bana nak rang, pulitik tu mah, nan kadipikian, sia nan manang, lai ka nyo laksanakan janjie,” kecek Tuan Baralah nan sadang mangalai dakek laci piti.

“Samo lo Baralah jo urang cadiak-cadiak tu tampak dek den,” jawek Pasa.

“Itu nan panting kok ndak manga wak sato pemilu, kan ka merubah nasib rakyaik,” kato Baralah.

“Nasib awak tantu awak ma ubah, pamarentah tu, banyak urusannyo mah,” jawek Rantau.

“Eee yala nye den, awak rakyaik ko nan utamo ka nyo urus, itu gunoe bupati walikota tu dipiliah, kalau ndak ka maurus rakyaik, bi baranti se lah surang-surang,” jawek Baralah.

Lah bacampua se ota antaro Jerman,Korea, pilkada, anta nan ma ka didanga. Sapagi itu, mode nan taralah, abis minum lapau langang, apak-apak tu bi pai batani, manggaleh ka pasa. Basigoro surang-surang sen. (malin kapalo koto)

The post Korea Tu Dakek Iran? appeared first on Prokabar.