“Lano lai puaso?” Batanyo Pasa sakutiko
“Lai baa tu?”
“Sagalo bakilek tampak den den.”
“Bato, jan main tuduah se Pasa.”
“Tumanga namoe tu, basabuik se kami-kami sarok kuaci ko bantuak kabau takajuik aguang?”

“Indak Pasa doh,tapi awak saduya laweh ko ha, sato den bagai,”kecek Malano.
“Malano main lendo se co ayia gadang mah Pasa,”kecek Gindo.

“Indak nyo agak stek alah juo doh,” Tembang, nan mudo matah manyolo.

“Oi Tembang, mainkan gitar tu, lah sayu Pasa den caliak,”kecek Malano.

“Lagu adek Mak katuju?”

“Mak Taci tu mainkan Mbang,” Jawek Pasa.

“Nan baru lah stek Mak, jan itu ka itu se.”

“Yo itu nan jaleh dek den nye.”

“Lagu corona se lah salayang, bia jalah lo dek Pasa tu,”kecek Tuak Bilang nan dari tadi galak-galak ketek se.

“Korona ndak lagu doh Mak, wabah tu mah samo jo kolera,”kecek Tembang.

“Indak ciek juo ka masak dek anak mudo ko, ndak antok tangih deknyo doh, bagitar lai, gaya banyak, isi tak ado,” semba Pasa.

“Takah sipuluik ye, ditanak badarai.” Tambah Pakiah.

“Jan salah-salah Mak,ambo ndak bantuak kabau takajuik aguang doh, nan mode tu Mak Pasa tu ha, lari ka biliak,pucek bantuak kain marekan disasah muko-e tu,” kecek Tembang.

Walaumenjalang babuko, paruik bunyi cigak diambek, hiruak, nan galak paralu juo. Galak urang sa lapau tu.

“Jan galak Mak,” kecek Tembang

“Mbang, den kecek an yo, saguruah-guruah ari, nan bada di lauik juo, sarusuah-suruah ati, nan gata digawuik juo, lai jaleh tu, apolai galak,” kecek Malano.

“Oh yo ndak puaso Mak tak ti wak doh, atau lah batarimo bansos itu?” Kecek Tembang.

“Tembak ba alamaiklah Tembang, sia nan dimakasuik, Malano? Darimana nyo dapek, wakden nan miskin dari inyo alun dapek lai,” kata Kuriak pulo.

“Kaba urang awak kaba-an Mak,” kecek Tembang.

“Den hampehan gitar ang tu Tembang, sumbarang malatuih se,”kecek Malano.

“Ado pepatahnyo mak, bunyi kecek marandang kacang, bunyi muluik mambaka buluah,” kecek Tembang jo bangganyo.

“Alun ang lai Tembang, jan ang adok-an lo pepatah petitih tuh ka Malano, nyo sapu beko,”kato Gindo.

“Sia se wak adok-i kini ko mah kalau soal adaik ko, kok ndak bantuak kabau takajuik aguang surang-surang beko antahlah,”jawek Tembang. Nyo patiak gitar tu, dibae nyo malagu Mak Taci.

“Santiang, yo kemenakan kandung saya engkau, hebat-hebat, beko japuk lanjo ka mintuo ang di rumah,” kecek Pasa.

Pacah lapau dek galak, sudah tu lah beserak se nak rang tu, bantuak kayu sapikua dikabek ciek. Wakatu babuko alah dakek, bi cigin ka rumah surang-surang. (Malin Kapalo Koto)

The post Bak Kabau Takajuik Aguang appeared first on Prokabar.