“Bialah ka-a dek den,” jawek Malin.
“Oi malin, racun semprot-semprot lado tu di lua nagari babuek mah, kalau dolar naik, mako naik lo harago pestisida tu, jan sumbarang jawek se,” kato Pasa.

“Bantuak apo dolar tu Yuang Pasa?” Batanyo Pakiah.
“Bantuak karisiak.”

Dolar lo curito di lapau pagi tadi. Alun surang juo nan mancaliak dolar sacaro langsuang, apolai mamacik.

“Wakden yo alun mancaliak lai, mode apo dolar amerika tu,” kecek Pasa.

“Dolar ka dolar juo, ancak ameh lai,” kato Bilang.

“Suai den, piti wak ko rapuah bana, bapadoman se ka ameh,” kecek Tembang pulo.

“Ameh tu bana nan tak ado,” kato Pakiah.

“Indak paralu ado, kan pedoman senye mah,” jawek Malano.

“Woi danga den lu, bekolah ameh-ameh tu. Kalau dolar naiak mode taun 98, krisis nagari wak, mako sagalo maha. Pupuak maha, racun maha, bebe-em naik, listrik naik, ongkos naik,” kecek Pasa.

“Tapi harago jua hasil pertanian kan naiak lo, baa gak ti,” kecek Malano.

“Iyo tapi rakyaik banyal sansaro, piti sarik,” jawek Pasa.

“Kok itu yo lo mah. Jadi baa nan rancak dek Pasa?”

“Dek den nan rancak, nagari ko aniang se lah lai, ko paja-paja nan candu bapolitik ko, nan indak ado karajo tu, barantilah lai baparang, stop dukuang mandukuang, bantuak mamak e surang-surang nan ka jadi presiden,” kato Pasa.

“Itu mato pancarian mah tuen Pasa, jan ditaga lo,” kato Tembang.

“Bagaji tu?” Batanyo Bilang.

“Itu tim-tim medsos tu bagaji mah, ribuan urang banyaknyo. Karajo e menjilek sudah tu mamburuak-buruak an lawan, sudah tu inyo samo inyo mamburuak-buruak an lai, gaji gadang, karajo adu domba se,” kato Tembang.

“Dolar gajinyo yo?” Pasa batanyo.
“Bato pulo”

Lapau langang manjalang matoari naik. Lah pai se surang-surang. **

The post Bantuak Apo Dolar tu Yuang? appeared first on Prokabar.