“Tu galeh mah Piak, jan didanga bana,” kecek Yuang Pasa.

“Galeh baa ko, keceknyo cuci gudang.”

“Makoe sikolah nye den mah. Itu urang manjua baju rirayo mah, nyo korting. Cuci gudang tu mukasuik-e obral. Sale-sale tu bahaso inggirih, samo ko korting. Lai jalai?” Cek Buyuang.

“Sero, pai wak Da.”

“Mangalah den jalehan lo cako tu ha, kini ka aden adok tembak Piak Manih ko. Piti lah sipi di dompet,” kecek Yuang Pasa tapi dalam ati sen.

“Yo Da pai wak,” nyo sasak-an dek Piak Manih.

“Tigo ari ko lah, bia tajua lado sagalombang lai lu,” jawek Buyuang.

“Jadi nah, tapi pasti-pasti yo. Piak nio lo babaju baru. Amuehe tu anak se nan baju baru,” makin tarang utak Piak Manih, samakin kalam muko Yuang Pasa.

“Kaolah dek ang sok tahu juolah,” kecek Buyuang dalam ati-e liak.

“Jadi aman tu, den taraweh lu,” cek Buyuang.

Upiak aniang je. Nyo tau Yuang Pasa pai ka lapau nah, indak ka musajik bagai doh.

“Tibo Buyuang nah, agak kalam ari mah, baa padam suluah Yuang,” kato Kutar, nan babini ka Solok, konco lamo Yuang Pasa. Wee baru tibo jo nduak bareh sarato anak-anak e.

“Iyo nah, solok Kutar nah, tajua nah,” kecek Buyuang.

“Jan asa mangecek Yuang, tajua baa. Ko buktie lah tibo liau di kampuang wak,” kato Pakiah.

“Nan den kecek an tajua yo bareh solok, indak Kutar nah,” kato Buyuang.

“Wakden jan dipagunciangan den gasiang induak bareh wak surang-surang beko baru tau raso,” sabuik Kutar nan rambuiknyo balah tangah tu.

“Tar simpan ilemu ang tu lu, buruak manuang Malano mandanga, rancak caritoan stek baa Solok kini?” Kato Pasa.

“Solok mode-mode tu se nye Pasa. Nan jalai lai tanang-tanang sen.”

” Ado cuci gudang ndak jalang rayo ko?” Tanyo Pasa.

” Kalau itu nan disabuik sarajuik banyaknyo. Tiok suduik,” kecek Kutar.

“Lai babali nah?”

“E yayai ye, dibali ciek disuruahnyo duo. Bali duo dapek ciek. Lah wak turuikan, dapek poin. Poin dikumpuan dapek baju salai, ampia ditangkok satpam den lai, abis piti den dek korting-korting tu,” kecek Kutar.

“Pasa lai sadang banabu taba kini pai lah ka Padang baok Piak Manih tu, bia manuka tek baya tu,” saran Tuan Baralah.

“Jadi salang piti gak singgik gadang lu bia den pai bisuak,” jawek Pasa.

Nan Pasa iyo nio pai lo. Nyo ka bali baju guntiang cino, batik, tu sarawa gak salai duo. Nan ndak tahan, Piak Manih kalau lah mancaliak baju rancak-rancak tu lah bantuak ayam di jamuran. Ndak bisa dilarai lai doh.

Bitulah kini Yuang Pasa makin padek manuangnyo. Sakali lacuik bisa kurui dompetnyo. Sabanta senye Yuang Pasa cigin nyo tingga-an lapau simpang lai. Nyo ka mambuek daftar lanjo kalau yo pai ka Padang. (Malin Kapalo Koto)

The post Rami-rami Cuci Gudang? Bara Rinso-e Tu? appeared first on Prokabar.