“Dek a Yuang? Pakai cadar bagai?” Malano icak-icak indak tahu.

“Ancak Malano aniang lai. Lah co iko nagari, kulabu sakuliliang dek asok, sabanta lai bi dek ranguak surang-surang, baru tau.”

“Bato berang-berang se Yuang, lai ilang asok dek berang tu?” Maningkah Tuak Bilang.

” Rimbo rayo dibaka, asok a nan ndak ka tibo. Nan korupsi tambah ganduik, nan dasi tambah panjang. Piti di bank, di kantua, di aspal, di pupuak, di gulo, tarui masuak rimbo. Indak jaran-jarannyo,” kecek Pasa.

“Pai Pasa ka musajik lah, iduik an mik, umumkan sinan.” Kecek Malin Marajo.

“Tapi yo heran den, tiok taun asok ko, kulabu nagari, kama se pemerintah ko takana dek den,” batanyo Gindo.

“Mak Gindo ancak ati-ati ngecek, dindiang kini batalingo, dek nakan indak talok ma anta nasi ka tangsi doh,” kecek Yuang Tembang.

Yuang Pasa nan lasui-lasui dek salemo, mambagi-bagi masket di lapau simpang. Dek inyo kapalo arak, jadi maraso batangguang jawab lo we-e.

“Santiang Yuang Pasa, indak dirinyo se nan nyo pikia doh,” kecek Tuak Bilang.

“Baranti lah ka pasa lu Bilang, kato Tuan Luak, kurangi karajo d lua rumah,” kecek Yuang Pakiah.

Sagalo urang di lapau ko, mancaliak ka Yuang Pakiah sambia galak.

” Kalau ka agiah nasihat Kiah, ancak di surau, jan siko,” kecek Malin.

“Sagalo indak ka lalu dek tuan-tuan mah, beko lah dek kuro, baru manyasa.”

Nan kabuik asok iyo taba, indak nampak nan jauh lai. Nan dakek se tarang-tarang tanah. Mato padiah, karongkongan apo lai. Sabana jahek urang nan mambaka rimbo tu.

“Di Riau mah mak,” kecek Tembang.

“Lai jalai dek den, nan ndak tau den sia nan mambaka,” jawek Yuang Pasa.

“Urang kayo mak.”

“Jadi baa nagari ko lai?” Batanyo Malano.

“Uruik se dado lai,” jawek Yuang Pasa.

“Awak nan sakik dek asok ko sia tangguang jawab Yuang?” Bilang bakato.

“BPJS mak,” disemba Tembang langsuang.

“Ha ha ha BPJS se tekor,” jawek Gindo.

“Kan lai cukai rokok, makoe pa kuek se marokok, bia rang lapau tambah kayo,” kecek Pakiah. Urang lapau indak ado, nan ado rang rumahnyo, Piak Lambuik.

“Oto tagak jan diantak,” kecek Yuang Pasa sambia malasui-lasui. (Malin Kapalo Koto)

The post Asok Sia Ko Oi appeared first on Prokabar.